Qaraqalpaqstan Respublikası Ámiwdárya rayonı hákimligi

Jarıs dawamında hár bir máhálle komandası jeńis ushın bar kúshin jumsadı. Futbol maydanlarında qızǵın, bir-birinen qızıqlı bellesiwler bolıp ótti. Hár bir oyında tek ǵana sporchılar emes, al tamashagóyler de óz komandasın qollap-quwatlap, haqıyqıy sport bayramı ortalıǵın jarattı.
Qızǵın bellesiwler juwmaǵında 1-orın - "Tolqın" APJ komandası, 2-orın - "A.Nawayı" MPJ komandası, 3-orın - "Kiyik-kopir" APJ komandası sıylı orındı iyeledi.
27-avgust kúni bolıp ótken saltanatlı sıylıqlaw máresiminde jeńimpaz hám sıylı orın iyeleri diplom, medal hám bahalı sawǵalar menen sıylıqlandı. Ilajda rayon hákiminiń orınbasarı Nodirbek Kamalov shıǵıp sóylep, denetárbiya hám sporttıń insan salamatlıǵındaǵı ornı, jaslardıń ruwxıy hám fizikalıq jetikligin támiyinlewdegi sheksiz áhmiyetine ayrıqsha toqtap ótti. 

Nodirbek Kamolov óz sózinde bul jarıs sporchılardıń sheberligin sınaqtan ótkergenin, jaslarda bir-birine húrmet, doslıq, awızbirshilik sıyaqlı pazıyletlerdi bekkemlegenin atap ótti. "Salamat áwlad - mámleket keleshegi, biziń eń úlken baylıǵımız," - dedi ol óziniń shıǵıp sóylegen sózinde.
Haqıyqatında da, búgingi kúnde mámleketimizde sporttı rawajlandırıw mámleketlik siyasattıń áhmietli baǵdarlarınan birine aylanǵan. Sońǵı jılları barlıq aymaqlarda zamanagóy sport obektleri qurılmaqta, máhálleler kesiminde sport maydanshaları shólkemlestirilmekte, jaslarǵa sport penen turaqlı shuǵıllanıw ushın keń imkaniyatlar jaratılmaqta.

Prezidentimizdiń baslaması menen "Salamat turmıs tárizi" hám "5 baslama" joybarları tiykarında jaslardı ǵalabalıq sportqa tartıw, qızlar sportın rawajlandırıw, qábiletli sporchılardı qollap-quwatlaw baǵdarında keń kólemli jumıslar ámelge asırılmaqta. Búgin jaslarımız tek ǵana respublikalıq emes, al xalıqaralıq maydanlarda da elimizdiń abırayın múnásip qorǵamaqta.
Rayonımızda shólkemlestirilgen "Hákim kubogi" jarısı da usı joqarı reformalardıń ámeliy kórinisi bolıp tabıladı. Sebebi, sport - densawlıq girewi, birlik hám doslıq tımsalı, jaslar tárbiyasınıń áhmiyetli mektebi bolıp esaplanadı. Ǵárezsizlik bayramı aldınan ótkerilgen bunday ilajlar jaslardıń kewlinde Watanǵa mehir, salamat turmısqa umtılıw hám doslıq baylanısların jáne de bekkemleydi.

Charos ARSLONOVA, rayon hákimliginiń Málimleme xızmeti baslıǵı.