Qaraqalpaqstan Respublikası Ámiwdárya rayonı hákimligi

Bul baǵdardaǵı jumıslardı jáne de jedellestiriw, aldınǵı tájiriybelerdi jáne de ǵalaba en jaydırıw maqsetinde 24-avgust kúni Ámiwdárya rayonında da bir qatar seminarlar shólkemlestirildi. Seminarlarǵa Qaraqalpaqstan Respublikası Ministrler Keńesi Baslıǵınıń awıl hám suw xojalıǵı máseleleri boyınsha orınbasarı Shuhrat Teshaev, rayon hákimi Sobir Xojametov, hákim orınbasarları, tarawǵa juwapker shólkemlerdiń basshıları, qánigeler hám fermer xojalıqlarınıń iyeleri belsene qatnastı. 

Dáslepki seminar Qańlı awılı aymaǵındaǵı "Mangitova Aziza" fermer xojalıǵında ótkerildi. Ilajda 2026-jıl zúrááti ushın ǵálle egiw máseleleri hár tárepleme dodalandı.

Seminarda Qaraqalpaqstan Respublikası Ministrler Keńesi Baslıǵınıń awıl hám suw xojalıǵı máseleleri boyınsha orınbasarı Shuhrat Teshaev shıǵıp sóylep, ǵálle egiw procesinde qollanılıwı kerek bolǵan aldınǵı tájiriybeler, nátiyjeli agrotexnikalıq ilajlar hám fermerler aldında turǵan áhmiyetli wazıypalarǵa tolıq toqtap ótti.

Sonday-aq, fermerler óz tájiriybeleri menen ortaqlasıp, jańa egis usılları, ónimdarlıqtı arttırıw hám jerdiń ónimdarlıǵın jaqsılaw jolları boyınsha pikir-usınıslar bildirdi. 

Keyingi seminar Qıpshaq paxta qabıllaw orayında dawam etti. Onda jaqınlasıp kiyatırǵan paxta jıyın-terimi máwsimine tayarlıq jaǵdayı úyrenildi. Jıynalǵanlar barlıq texnikalardıń máwsimge tolıq tayarlıǵı, kombayn hám agregatlardıń jumısshı jaǵdayǵa keltirilgeni menen jaqınnan tanıstı. Bıyılǵı paxta jıyın-terimin óz waqtında hám sapalı juwmaqlaw ushın barlıq zárúr sharayatlar jaratılǵanın seminar qatnasıwshıları ámelde kórdi.

Ilajda shıǵıp sóylegenler atap ótkenindey, paxta jıyın-terimi awıl xojalıǵı tarawındaǵı jıldıń eń juwapkershilikli dáwirlerinen biri bolıp esaplanadı. Zúráátti óz waqtında, sapalı hám zıyansız jıynap alıwda tayarlıq processleri, ásirese, texnikalardı tolıq jumıs islew jaǵdayına keltiriw oǵada úlken áhmiyetke iye. Sebebi paxta jıyın-teriminde hár bir minut, hár bir texnikanıń ónimli islewi zúrááttiń táǵdirin belgileydi. 

Usılardı esapqa alǵan halda rayonda máwsimge qatań tayarlıq kórilip, barlıq kombaynlar, traktorlar hám basqa da járdemshi agregatlar tolıq kózden ótkerildi, zárúr awısıq bólekler almastırılıp, mexanikalıq jaqtan tayar jaǵdayǵa keltirildi. Bul bolsa kelesi máwsimdi zıyansız ótkeriw, zúráátti qısqa waqıtta jıynap alıw imkaniyatın beredi.

Sonı atap ótiw kerek, texnika qurallarınıń tayarlıǵı tek ǵana zúráátti joǵaltpastan jıynap alıwǵa emes, al miynet ónimdarlıǵın arttırıw, qárejetlerdi azaytıw hám nátiyjede paxtanıń sapasın joqarı dárejede saqlap qalıwǵa xızmet etedi. Ásirese, mexanizaciya dárejesi joqarı bolǵan aymaqlarda terim processleri ádewir jeńil, nátiyjeli hám únemli ótedi. 

Seminarlardıń keyingi mánzili Chaykól awılı aymaǵındaǵı "Jayxun Chaykól" fermer xojalıǵı boldı. Bul jerde 2025-jıl ónimi ushın egilgen paxta maydanlarında defoliaciya jumıslarına ayrıqsha itibar qaratıldı. Ǵawashanıń japıraǵın tógiw arqalı zúráátti tez pisiriw hám sapalı jıynap alıw, terim procesinde miynet nátiyjeliligin arttırıwda defoliaciyanıń áhmiyeti ayrıqsha atap ótildi.

Ótkerilgen ushırasıwlar procesinde fermerler hám qánigeler óz-ara tájiriybe almasıdı, jańasha qatnaslar boyınsha másláhátler berdi. Eń áhmiyetlisi, bunday seminarlar tarawǵa baylanıslı mashqalalardı ornında úyreniw hám jedel sheshiw imkaniyatın beredi. Bul bolsa, álbette, awıl xojalıǵı rawajlanıwında nátiyjelilikti arttırıwǵa xızmet etedi.

Búgin elimizde awıl xojalıǵı tarawınıń aldına qoyılǵan maqsetler úlken. Ónimdarlıqtı arttırıw, zamanagóy agrotexnologiyalardı engiziw, ekologiyalıq taza ónim jetistiriw, eksport potencialın kúsheytiw - bulardıń barlıǵı xalqımızdıń abadan turmıs keshiriwi ushın bekkem tiykar jaratadı. Ótkerilgen seminarlar bolsa bul maqsetlerge erisiwde áhmiyetli qural bolıp xızmet etetuǵını sózsiz.

Charos ARSLONOVA, rayon hákimliginiń Málimleme xızmeti baslıǵı.