ÁMIWDÁRYA RAYONÍNDA IRI GRANT JOYBARÍ TIYKARÍNDA ZAMANAGÓY IT ORAYÍ SHÓLKEMLESTIRILEDI
2026-11-19 17:30:00 / Министрлик

Qaraqalpaqstan Respublikasınıń 7 rayonında zamanagóy IT orayların qurıw, jaslardıń málimleme texnologiyaları hám sanlı kónlikpeler boyınsha bilimlerin arttırıwǵa qaratılǵan iri grant joybarı sheńberinde Ámiwdárya rayonında da áhmiyetli ámeliy jumıslar alıp barılmaqta.
Bul joybar sheńberinde Koreya xalıqaralıq birge islesiw agentligi (KOICA) ekspertleri Ámiwdárya rayonına barıp, iri muǵdardaǵı grant joybarı tiykarında IT orayınıń qurılısı ushın ajıratılǵan jer maydanın úyrendi.
Sapar dawamında qánigeler tárepinen ajıratılǵan jer maydanınıń házirgi jaǵdayı, aymaqtıń injenerlik-kommunikaciya infrastrukturası, qurılıs jumısların shólkemlestiriw imkaniyatları hám joybar talaplarına muwapıqlıǵı hár tárepleme kózden ótkerildi.
Sonday-aq, bolajaq IT orayınıń aymaqlıq jaylasıwı, jer maydanınan aqılǵa uǵras hám nátiyjeli paydalanıw, zamanagóy bilimlendiriw infrastrukturasın jaratıw hám jaslar ushın qolaylı oqıw ortalıǵın qáliplestiriw máselelerine ayrıqsha itibar qaratıldı.
Bul baslama Ámiwdárya rayonında sanlı bilimlendiriwdi rawajlandırıw, jaslardıń zamanagóy kásiplerdi iyelewine járdemlesiw, olardıń bántligin támiyinlew hám keleshekte xalıqaralıq miynet bazarında básekige shıdamlı IT qánigelerin tayarlawǵa xızmet etedi.









