PUQARALARDÍŃ MÚRÁJATLARÍ KÓSHPELI QABÍLLAWDA TÍŃLANDÍ
2026-11-19 17:25:00 / Министрлик

Ámiwdárya rayonında Qaraqalpaqstan Respublikası prokurorınıń orınbasarı, ádillik aǵa keńesgóyi N.B.Djolamanovtıń qatnasıwında puqaralardıń múrájatları boyınsha kóshpeli qabıllaw ótkerildi.
Qabıllaw dawamında tiykarınan agrar hám awıl xojalıǵı tarawına baylanıslı máseleler kórip shıǵıldı. Atap aytqanda, puqaralar tárepinen sharwashılıq jumısın rawajlandırıw ushın kredit qarjıların ajıratıw, awıl xojalıǵı egislik maydanlarına suw jetkerip beriwdegi mashqalalardı saplastırıw, isbilermenlik jumısın jolǵa qoyıw hám rawajlandırıw maqsetinde kadastr hújjetlerin rásmiylestiriwde ámeliy járdem kórsetiw sıyaqlı máseleler boyınsha múrájatlar bildirildi.
Kóshpeli qabıllawda hár bir múrájat hár tárepleme tıńlanıp, olardı nızamlı sheshiw, bar mashqalalardı saplastırıw hám puqaralarǵa ámeliy járdem kórsetiw boyınsha tiyisli juwapkerlerge zárúr kórsetpe hám tapsırmalar berildi.









