ÁMIWDÁRYA RAYONINDA JASLAR BÁNTLIGIN TÁMIYINLEWGE QARATILǴAN USHIRASIWLAR ÓTKERILDI
2026-10-15 17:20:00 / Министрлик
Jaslar menen ashıqtan-ashıq sóylesiw: mashqalalar analizi, anıq sheshimler hám jańa imkaniyatlar
Ámiwdárya rayonında respublika kólemindegi basshılardıń qatnasıwında jaslar menen ushırasıwlar shólkemlestirildi. Bul ushırasıwlardan tiykarǵı maqset jaslardıń bántligin támiyinlew, olardıń mashqala hám usınısların úyreniw, jumıs penen támiyinlew hám keleshektegi kásiplik jumısın jolǵa qoyıw baǵdarında ámeliy járdem beriwden ibarat. Ilajda Qaraqalpaqstan Respublikası Ministrler Keńesi Baslıǵınıń orınbasarı Bayram Atemuratov, Qaraqalpaqstan Respublikası Salıq basqarmasınıń baslıǵı Erkin Nurmanov, Ámiwdárya rayonı hákimi Sabır Xojametov, hákim orınbasarları hám rayondaǵı barlıq shólkem hám mákemelerdiń basshıları qatnastı.
Ushırasıwlar rayondaǵı "Tolqın" APJ, "Qıtay" APJ hám "Ortaqala" APJ imaratlarında bolıp ótti. Olarda usı aymaqlar hám olarǵa jaqın máhállelerden 70 ke shamalas jaslar qatnastı. Sonıń ishinde, 2026-jılı joqarı bilimlendiriw hám professional bilimlendiriw mákemelerin, sonday-aq, ulıwma bilim beriw mekteplerin tamamlap atırǵan pitkeriwshiler hám házirgi waqıtta jumıssız bolǵan jaslar menen júzbe-júz sáwbetlesti.
Sóylesiw dawamında jaslardıń bántligin támiyinlew, olardı bar bos jumıs orınlarına jaylastırıw, kásip-ónerge baǵdarlaw, isbilermenlik jumısına tartıw jáne óz qızıǵıwshılıǵı hám potencialın júzege shıǵarıw imkaniyatları dodalandı.
Hár bir jastıń múrájatı hám usınısı ayrıqsha tıńlanıp, bar mashqalalar hár tárepleme tallandı. Bildirilgen máseleler boyınsha tiyisli shólkem hám uyımlardıń basshılarına olardıń sheshimin tabıw, jaslardı qollap-quwatlaw jáne bántligin támiyinlew boyınsha zárúr ilajlardı kóriw boyınsha tiyisli wazıypalar belgilendi.