Xalıq deputatları Ámiwdárya rayonlıq Keńesiniń gezektegi 25-sessiyası bolıp ótti
2026-10-03 11:05:00 / Министрлик
Ámiwdárya rayonı hákimliginiń májilisler zalında Xalıq deputatları Ámiwdárya rayonlıq Keńesiniń jetinshi shaqırıq gezektegi 25-sessiyası bolıp ótti.
Sessiyaǵa rayon hákimi Sabir Xojametov, rayon hákiminiń orınbasarları, tiyisli shólkem hám uyımlardıń basshıları, ekspert toparınıń aǵzaları, mákan puqaralar jıyınlarınıń baslıqları, hayal-qızlar belsendileri hám ǵalaba xabar qurallarınıń wákilleri qatnastı.
Sessiya jumısın Xalıq deputatları Ámiwdárya rayonlıq Keńesiniń baslıǵı Alisher Yoldoshev alıp bardı. Májilis Ózbekstan Respublikası hám Qaraqalpaqstan Respublikası mámleketlik gimnleriniń atqarılıwı menen baslandı. Sessiya xatkerligine 23-"Qıpshaq" saylaw okruginen deputat Muyassar Raxmatullaeva kandidaturası deputatlar tárepinen bir dawıstan maqullandı.
Kún tártibindegi máseleler boyınsha rayon hákimi orınbasarları hám tiyisli shólkem hám uyımlar basshılarınıń esabatları hám málimlemeleri tıńlandı.
Dodalawlar dawamında deputatlar tárepinen bildirilgen pikir-usınıslar hár tárepleme kórip shıǵılıp, berilgen sorawlarǵa juwapkerler tárepinen tolıq juwaplar berildi.
Sessiya juwmaǵında kún tártibindegi barlıq máseleler boyınsha tiyisli qararlar qabıl etilip, olardıń orınlanıwın támiyinlew boyınsha juwapkerlerge zárúr wazıypalar belgilendi.