Ámiwdárya rayonı prokurorı Ravshanbek Bauaddinovtıń rayon xalqına múrájatı
2026-08-25 17:50:00 / Министрлик
Húrmetli Ámiwdárya rayonı xalqı!
"Insan qádiri ushın" principi tiykarında aymaqta jınayachılıq hám huqıqbuzarlıqlarǵa mawasasız gúresiw, olardıń aldın alıw baǵdarında profilaktikalıq ilajlar sistemalı túrde ámelge asırılmaqta. Bunıń nátiyjesinde jınayachılıq kórsetkishlerin sezilerli dárejede azaytıwǵa erisilmekte.
Biraq, usı jıldıń ótken dáwirinde ólim menen baylanıslı jol-transport hádiyseleriniń keskin artqanı bárshemizdi ayrıqsha táshwishke salmaqta.
Tallawlar sonı kórsetpekte, bunday hádiyselerdiń tiykarǵı sebepleri - jol háreketi qaǵıydalarına ámel etpew, itibarsızlıq hám juwapkershiliksizlik, transport quralın más halda basqarıw, aydawshılıq mádeniyatınıń tómenligi, transport qurallarınıń texnikalıq nasazlıǵı, sonday-aq, aydawshılarda jeterli tájiriybe hám kónlikpelerdiń joq ekenligi bolıp esaplanadı.
Sonlıqtan, barlıq puqaralarımızdı jol-transport hádiyseleriniń aldın alıwda belsene qatnasıwǵa shaqıraman.
Húrmetli aydawshılar!
Jollarda transport quralın basqarıwda:
jol háreketi qaǵıydalarına qatań ámel etiń;
belgilengen tezlik normasınan asırmań;
svetofor signalları hám jol belgileri talaplarına ámel etiń;
más yamasa sharshaǵan jaǵdayda transport quralın basqarmań;
háreket waqtında telefannan paydalanbań, dıqqatıńızdı joldan aljastırmań;
transport quralıńızdıń texnikalıq jaǵdayına itibarlı bolıń;
jol háreketiniń basqa qatnasıwshılarına húrmet penen múnásibette bolıń;
jollarda sabırlı, sergek hám juwapkershilikli bolıń.
Sebebi, ruldegi bir demlik itibarsızlıq insannıń pútkil ómirine tásir etiwi múmkin. Hár bir aydawshı jolda tek ǵana óziniń emes, al basqalardıń da ómiri hám qáwipsizligi ushın juwapker.
Bársheńizdi jol háreketi qaǵıydalarına qatań ámel etiwge, jaqınlarıńız hám perzentlerińizdiń qáwipsizligine biypárwa bolmawǵa shaqıraman.
"Jol qaǵıydası - ómir paydası!"
Húrmet penen,
Ámiwdárya rayonı prokurorı
Ravshanbek Bauaddinov.