Qaraqalpaqstan Respublikası Ámiwdárya rayonı hákimligi

Húrmetli puqaralar!

Aymaqta usı jıldıń 7 ayında jınayatlar kórsetkishi sezilerli dárejede, sonıń ishinde, shańaraqlıq turmıs sheńberinde júz bergen jınayatlar keskin artqanın kórsetpekte.

Aymaqta bul kategoriyadaǵı jınayatlardıń aldın alıwda mámleketlik uyımlar, máhálle, bilimlendiriw mákemeleri menen birgelikte mánzilli jumıslar shólkemlestirilmekte, onda tınısh emes shańaraqlar, shańaraqlıq hám qońsıshılıq kelispewshilikleri bar shańaraqlardıń dizimleri qáliplestirildi, olardıń mashqalaları úyrenilip, sheshiw ilajları sistemalı túrde ámelge asırılmaqta.

Biraq, hár birimiz ózimizde tárbiya, qadaǵalaw hám nızamǵa húrmet sıyaqlı sezimlerdi sińdirmesek gózlengen nátiyjege erisip bolmaydı.
Tallawlarǵa bola, shańaraqlıq tárbiyanıń jetispewshiligi, ata-ana qadaǵalawınıń tómenligi, shańaraqta júzege kelgen salamat emes ortalıq, ádep-ikramlılıq qaǵıydalarına ámel etpew, kóshe ortalıǵındaǵı unamsız ádetler, spirtli ishimlik tásiri, ózin kórsetiw yamasa basqalardan ústin qoyıw tilegi sıyaqlı faktorlar usı kategoriyadaǵı jınayatlarǵa jol ashıp bermekte. 

Nızam ústinligin támiyinlew, shańaraqlıq zorlıq, hár qanday shańaraq-turmıs sheńberinde júz bergen jınayat ushın operativ ilajlar kóriw, jábirleniwshilerdi qorǵaw hám ayıpkerlerdi nızam sheńberinde juwapkershilikke tartıw arqalı jazanıń sózsiz ekenligin támiyinlew zárúr.
Tınısh shańaraq - turaqlı jámiyettiń tiykarı. Hár birimiz shańaraqta óz-ara húrmet, miyrim-shápáát hám nızamǵa húrmetti ornatsaq, jınayachılıqqa orın qalmaydı.

Itibarlarıńız ushın raxmet!