Ámiwdáryalı yoga trenerleri jáhán chempionatında elimiz abırayın múnásip qorǵadı
2026-06-18 11:35:00 / Министрлик
Ámiwdárya rayonınıń professional yoga trenerleri, ana-bala - Gulchiroy Karimova hám onıń qızı Farangiz Jabbarbergenova tariyxta birinshi márte 2026-jıl 4-8-iyun kúnleri Hindstannıń Ahmadobod qalasında ótkerilgen Yogasana boyınsha Jáhán chempionatında Ózbekstan saylandı komandası quramında qatnasıp, elimizdiń abırayın múnásip qorǵadı.
🌿 Búgingi kúnde Ámiwdárya rayonında yoga menen shuǵıllanıwshı hayal-qızlar sanı barǵan sayın artıp barmaqta. Bul baǵdarda tájiriybeli trener Gulchiroy Karimovanıń úlesi sheksiz. Onıń baslaması menen Tolqın awılı, Áliysher Nawayı máhállesi hám Qıpshaq qalashasında hayal-qızlar ushın yoga klubları shólkemlestirilip, júzlegen hayal-qızlardıń salamat turmıs tárizine ámel etiwine járdemlesilmekte.
Ámiwdárya rayonı hákiminiń orınbasarı, Shańaraq hám hayal-qızlar bóliminiń baslıǵı Gozal Saburova Áliysher Nawayı máhállesindegi yoga klubına barıp, Ózbekstan saylandı komandası aǵzaları Gulchiroy Karimova hám Farangiz Jabbarbergenovanı Hindstanda bolıp ótken Jáhán chempionatındaǵı tabıslı qatnasıwı menen qutlıqladı.
Ámiwdáryalı ana-bala trenerleriniń xalıqaralıq maydandaǵı qatnasıwı tek ǵana rayonımız emes, al pútkil elimiz ushın maqtanısh. Olardıń miyneti hám pidayılıǵı sebepli búgin kóplegen hayal-qızlar salamat turmıs tárizin tańlap, sport penen turaqlı shuǵıllanbaqta.