Ámiwdárya rayonında medicinalıq akciya: balalar ushın biypul kórik hám dáslepki júrek operaciyaları ótkerildi
2026-06-15 09:45:00 / Министрлик
Respublikalıq Balalar milliy medicina orayınıń Aralboyı klinikası tárepinen Ámiwdárya rayonında "Salamatlıq akciyası" ótkerildi. Ilaj sheńberinde 0 den 18 jasqa shekemgi balalar hám jas óspirimler paytaxttan kelgen joqarı mamanlıqtaǵı qánigeler tárepinen biypul medicinalıq tekseriwden ótkerildi.
Ámiwdárya rayonı medicina birlespesinde otolaringolog, neyroxirurg, plastik xirurg, nevropatolog, ortoped, ulıwma xirurg, urolog, kardioxirurg, pediatr hám gematolog sıyaqlı qánigeler hár bir nawqastı individual úyrendi. Qıyın xirurgiyalıq operaciyanı talap etetuǵın jaǵdaylar boyınsha Aralboyı klinikasına jollamalar berildi hám bul operaciyalardıń barlıǵı tolıq biypul ótkeriletuǵını belgilendi.
✨ Paytaxtlı tájiriybeli kardioxirurglar tárepinen Ámiwdárya rayonı medicinası tariyxında birinshi márte balalarda júrek xirurgiyalıq operaciyaları jergilikli sharayatta tabıslı orınlandı. Nátiyjede nawqaslardıń úlken qarjı hám waqıt jumsap paytaxtqa barıwına zárúrlik qalmadı.
📌 Bul iri akciya tek ǵana profilaktikalıq tekseriw emes, al real ámeliy járdem maydanına aylandı. Júzlegen járdemge mútáj balalar tereńlestirilgen medicinalıq tekseriwden ótip, keyingi emlew basqıshlarına jiberildi.