1-IYUN - XALIQARALIQ BALALARDI QORǴAW KÚNI KEŃ BELGILENDI
2026-06-01 14:10:00 / Министрлик
Búgin Ámiwdárya rayonında 1-iyun - Xalıqaralıq balalardı qorǵaw kúni múnásibeti menen kóterińki ruwx hám bayram keypiyatı húkim súrdi. Rayonlıq dem alıw baǵında balalar ushın úlken bayram ilajı shólkemlestirildi.
Bayram ilajında rayon hákiminiń orınbasarları Nodirbek Kamalov hám Gózzal Saburova qatnasıp, barlıq balalardı usı qutlı sáne menen qızǵın qutlıqladı. Óz qutlıqlawlarında perzentlerimizdiń baxıtlı balalıǵı, sapalı bilim alıwı, talant hám qábiletlerin júzege shıǵarıwı ushın jaratılıp atırǵan imkaniyatlar haqqında toqtap ótip, keleshek iyeleri bolǵan jas áwladqa jaqsı tileklerin bildirdi.
Ilaj dawamında balalar ushın ráńbáreń hám qızıqlı mádeniy-kewilashar baǵdarlamalar kórsetildi. Qábiletli jaslar hám kórkem óner sheberleriniń atqarıwındaǵı qosıqlar, saxnalıq kórinisler, ayaq oyınlar bayramǵa jáne de kóterińkilik baǵıshladı.
Sáne múnásibeti menen shólkemlestirilgen ilaj sheńberinde rayondaǵı mektepke shekemgi bilimlendiriw shólkemleriniń pidayı jámáátleri de itibardan shette qalmadı. Balalardı hár tárepleme bárkamal etip tárbiyalaw, olardıń tálim-tárbiyası hám kámalǵa keliwi jolında nátiyjeli miynet etip atırǵan pedagog hám tárbiyashılarǵa minnetdarshılıq xatları tapsırıldı. Bul bolsa olardıń mashaqatlı hám maqtanıshlı miynetine bildirilgen joqarı tán alıw boldı.