Ata-babalar esteligine húrmet - xalqımızǵa tán iygilikli qádiriyat
2026-05-18 17:00:00 / Министрлик
Qurban hayıtı bayramı qarsańında, 17-may kúni Ámiwdárya rayonı Tolqın awılı aymaǵında jaylasqan "Qolbergen baba" qoyımshılıǵında keń kólemli hashar jumısları shólkemlestirildi. Iygilikli baslama tiykarında ótkerilgen bul abadanlastırıw ilajında máhálle belsendileri, nuraniylar, jaslar hám keń jámiechilik wákilleri belsene qatnastı.
Xásher dawamında qoyımshılıq aymaǵı tártipke keltirilip, shóp-sharlardan tazalanıp, jollar tártipke keltirildi, tereklerge aqlaw berilip, qorshaǵan ortalıq jáne de abadanlastırıldı. Qatnasıwshılar tárepinen muqaddes orınnıń taza hám azada saqlanıwına ayrıqsha itibar qaratıldı.
Xalqımız ázelden ata-babalardıń esteligine húrmet kórsetiwdi, qoyımshılıqlardı abat hám tártipli saqlawdı sawaplı hám ullı ámel dep biledi. Ásirese, múbárek Qurban hayıtı qarsańında ámelge asırılıp atırǵan bunday qayırlı jumıslar insan qálbinde miyrim-shápáát, awızbirshilik hám jaqsılıq sezimlerin jáne de bekkemleydi.
Bunday hasharlar tek ǵana muqaddes orınlardı abat etiwge emes, al máhálle xalqınıń óz-ara awızbirshiligin, tileklesligin jáne de kúsheytiwge xızmet etedi. Aqırı, abat máhálle - tınısh hám abadan turmıs ólshemi bolıp esaplanadı.