Xalıqtıń múrájatları itibar orayında
2026-05-12 17:10:00 / Министрлик
Ámiwdárya rayonı Ortaqala awılında Qaraqalpaqstan Respublikası Ministrler Keńesi Baslıǵınıń orınbasarı, Shańaraq hám hayal-qızlar komitetiniń baslıǵı Maryam Axmedova tárepinen xalıqtıń múrájatların úyreniw hám olardıń mashqalaların ornında sheshiw maqsetinde kóshpeli qabıllaw shólkemlestirildi.
Bul kóshpeli qabıllawda Ámiwdárya rayonı hákiminiń orınbasarı, Shańaraq hám hayal-qızlar bóliminiń baslıǵı Gózal Saburova, tiyisli shólkem hám mákemelerdiń juwapkerleri hám máhálle belsendileri qatnasıp, puqaralardıń múrájatların tıńladı.
Qabıllaw dawamında puqaralar tárepinen turaq jaydı ońlaw, isbilermenlik jumısın jolǵa qoyıw ushın jeńilletilgen kredit alıw, elektr energiyası támiynatın jaqsılaw, ishki jollardı ońlaw, turaqlı jumıs penen támiyinlew, sociallıq qorǵaw máseleleri, materiallıq járdem ajıratıw hám densawlıǵı menen baylanıslı mashqalalar boyınsha emleniw ushın ámeliy járdem kórsetiw boyınsha múrájatlar bildirildi.
Hár bir múrájat juwapkerler tárepinen hár tárepleme úyrenilip, ayırım máseleler ornında sheshildi. Qosımsha úyreniw talap etiletuǵın múrájatlar boyınsha tiyisli shólkem basshılarına anıq wazıypalar belgilep berildi hám orınlanıwı qadaǵalawǵa alındı.