"Pursat, mártlik, jigerlilik!" súreni astında sport marafonı shólkemlestirildi
2026-05-08 17:55:00 / Министрлик
Jaslar arasında salamat turmıs tárizin keńnen úgit-násiyatlaw, olardı sportqa tartıw hám náshebentlik sıyaqlı unamsız illetlerdiń aldın alıw maqsetinde Ámiwdárya rayonında "Pursat, mártlik, jigerlilik!" súreni astında velomarafon hám juwırıw marafonı bolıp ótti.
Sonday-aq, bul sport ilajı elimizde keńnen belgilenip atırǵan "9 may - Eslew hám qádirlew kúni" bayramına baǵıshlanıp, watansúyiwshilik, mártlik hám jigerlilik ideyaların úgit-násiyatlawǵa xızmet etti.
Marafonda rayon hákiminiń orınbasarı Nodirbek Kamalov qatnasıp, búgingi kúnde salamat turmıs tárizin qáliplestiriw, jaslardı sport hám fizikalıq belsendilikke tartıw hár birimizdiń áhmiyetli wazıypamız ekenin atap ótti. Sonday-aq, ol jas áwladtı zıyanlı ádetlerden saqlaw, olardıń bos waqtın mazmunlı shólkemlestiriw arqalı jámiyette salamat ortalıqtı bekkemlew múmkin ekenligin atap ótti.
Ilaj dawamında sporttı súyiwshi jaslar hám watanlaslarımız joqarı keypiyatta belsene qatnasıp, ózleriniń fizikalıq tayarlıǵı hám sportqa bolǵan qızıǵıwshılıǵın kórsetti.
Marafon juwmaǵında jeńimpazlıqtı qolǵa kirgizgen hámde belsene qatnasqan qatnasıwshılar shólkemlestiriwshiler tárepinen diplom, estelik sawǵaları hámde alǵısnamalar menen sıylıqlandı.
Bunday sport ilajları jaslardı salamat turmısqa shaqırıp, jámiyetimizde birlik, awızbirshilik hám watansúyiwshilik sezimlerin jáne de bekkemlewge xızmet etedi.