Ámiwdárya rayonında 9-may - Eslew hám qádirlew kúni múnásip belgilendi
2026-05-08 18:40:00 / Министрлик
Ámiwdárya rayonında "Pursat, mártlik, jigerlilik!" súreni astında 9-may - Eslew hám qádirlew kúnine baǵıshlanǵan ruwxıy-aǵartıwshılıq ilaj bolıp ótti.
Rayon orayındaǵı Eslew maydanında shólkemlestirilgen ilajda rayon hákimi Sobir Xojametov, qorǵanıw hám huqıq qorǵaw uyımlarınıń wákilleri, veteran áskerler, nuraniylar, jaslar hám keń jámiyechilik qatnastı. Ilaj aldınan jaslar arasında ótkerilgen velomarafon hám juwırıw jarıslarınıń jeńimpazları saltanatlı túrde sıylıqlandı.
Rayon hákimi Sabır Xojametov bayram qutlıqlawında búgingi tınısh hám paraxat turmısımız ata-babalarımızdıń ullı mártligi hám pidayılıǵı esabınan jaratılǵanın ayrıqsha atap ótti.
Ilaj dawamında Watan hám tınıshlıqtı jırlawshı qosıqlar, saxnalıq kórinisler kórsetildi. Áskeriy orkestrdiń sazları astında Hásiretli ana esteligine gúller qoyılıp, Ekinshi jer júzilik urıs hám xızmet wazıypasın atqarıw waqtında qaytıs bolǵan watanlaslarımızdıń esteligi eske alındı.
Eslew - máńgi, qádirlew bolsa xalqımızǵa tán iygilikli pazıylet.