Pitkeriwshi jaslar menen ashıqtan-ashıq pikirlesiw
2026-04-24 17:40:00 / Министрлик
Búgin Ámiwdárya rayonındaǵı 9-sanlı balalar muzıka hám kórkem óner mektebinde pitkeriwshi jaslar ushın áhmietli hám mazmunlı ushırasıw shólkemlestirildi. Ilajda rayon hákimi Sabır Xojametov, hákim orınbasarı Nodirbek Kamalov hám Tashkent mámleketlik agrar universiteti agronomiya hám agrotexnologiyalar kafedrasınıń professorı Ne'matulla Xudaybergenov, Agronomiya hám agrotexnologiyalar kafedrası docenti U.Sultanov, agroximiya hám topıraqtanıw kafedrası assistenti M.Tursınbaevlar qatnasıp, jaslar menen qızǵın pikirlesti.
Ushırasıw dawamında agrar tarawdıń búgingi kúndegi áhmiyeti, onıń ekonomikadaǵı ornı hám keleshektegi perspektivaları haqqında hár tárepleme pikir júrgizildi. Professor tárepinen universitettegi bar bilimlendiriw baǵdarları, qabıllaw processleri, jańa tártipler hám studentler ushın jaratılǵan zamanagóy sharayatlar haqqında tolıq maǵlıwmatlar berildi.
Ásirese, ámeliyatqa baǵdarlanǵan bilimlendiriw sisteması, zamanagóy laboratoriyalar, xalıqaralıq birge islesiw baǵdarlamaları hám studentler ushın jaratılǵan keń imkaniyatlar jaslardıń úlken qızıǵıwshılıǵına sebep boldı.
Ilaj dawamında jaslar ózlerin qızıqtırǵan sorawlarǵa juwap aldı, keleshektegi kásipti tańlaw boyınsha paydalı usınıslar aldı. Bunday ushırasıwlar olardıń durıs jol tańlawında ayrıqsha áhmiyetke iye.
Keleshegin puqta rejelestirip atırǵan jaslar ushın bunday ushırasıwlar jańa imkaniyatlar esigin ashadı.