Qaraqalpaqstan Respublikası Konstituciyası qabıl etilgeniniń 33 jıllıǵı keńnen belgilendi
2026-04-09 17:35:00 / Министрлик
1993-jıl 9-aprel — Qaraqalpaqstan Respublikası tariyxındaǵı áhmiyetli sáne. Tap usı kúni Respublikanıń tiykarǵı nızamı Konstituciya qabıl etilip, xalıq suvereniteti, insan huqıq hám erkinlikleri hám de mámleket basqarıwınıń bekkem huqıqıy tiykarı jaratıldı.
Búgin bul qutlı sáne 33 jıllıǵı múnásibeti menen elimizde keńnen belgilenbekte. Usı múnásibet penen Ámiwdárya rayonı Mádeniyat bóliminde de bayram ilajı shólkemlestirildi.
Xalıq deputatları rayonlıq Keńesi sekretariatınıń baslıǵı Mansur Orazbaev shıǵıp sóylep, Konstituciyanıń jámiyet turmısındaǵı sheksiz ornın ayrıqsha atap ótti hám bársheni bayram menen qutlıqladı.
Bayram dawamında kórkem óner ǵayratkerleri hám jas dóretiwshiler tárepinen Watan, tınıshlıq hám doslıqtı jırlawshı qosıqlar atqarılıp, qatnasıwshılarǵa kóterińki keypiyat baǵıshlandı.
Atap ótilgenindey, Konstituciya - xalqımızdıń birligi, awızbirshiligi hám rawajlanıwınıń bekkem tiykarı bolıp esaplanadı. Onda belgilengen principler búgingi kúnde elimizde alıp barılıp atırǵan keń kólemli reformalar hám dóretiwshilik jumıslarda óz kórinisin tappaqta.
Búgin Qaraqalpaqstan Respublikasında ámelge asırılıp atırǵan úlken qurılıs hám abadanlastırıw jumısları, jańa imkaniyatlar — hámmesi mine usı tiykarǵı nızamımızda jámlengen iygilikli maqsetlerdiń nátiyjesi.
Konstituciya — bul tek ǵana hújjet emes, al xalıqtıń erk-ıqrarı, ǵárezsizlik hám jarqın keleshektiń kepili bolıp esaplanadı.