Qaraqalpaqstan Respublikası Ámiwdárya rayonı hákimligi

Assalawma aleykum, húrmetli puqaralar!

Sońǵı waqıtları jol-transport hádiyseleri, yaǵnıy avtoavariyalar sanınıń artıp baratırǵanı bárshemizdi táshwishke salmaqta.
Ótken 2025-jıl hám usı jıldıń ótken dáwirinde rayon aymaǵında 50 jol transport hádiysesi menen baylanıslı jınayatlar islengen bolıp, olardıń 13 inde adamlar qaytıs bolǵan.

Mámleketimiz basshısı tárepinen ámelge asırılıp atırǵan reformalar nátiyjesinde rayonımızda xalqımızdıń qálew hám tileklerinen kelip shıǵıp 200 kilometrden aslam ishki jollar ońlandı, 9 kilometr jollar jańadan asfaltlandı.

Biraq, ayırım transport qurallarınıń aydawshıları bul imkaniyat hám qolaylıqlardan nadurıs paydalanıp, tezlikti asırmaqta, más halda avtotransportlardı basqarmaqta, jol háreketi qaǵıydalarına ulıwma boysınbay kiyatır.
Aqıbetinde aydawshılardıń nadurıs is-háreketleri ayanıshlı waqıya menen juwmaqlanbaqta.

Bunday hádiyseler tek ǵana materiallıq zıyan emes, al insan ómiri hám densawlıǵına úlken qáwip tuwdıradı.
Usı múnásibet penen, bársheńizden:
✅ Avtomobil basqarıwda belgilengen tezlik normalarına ámel etiń;
✅ Jol háreketi qaǵıydaların buzbań hám bárqulla abaylı bolıń;
✅ Más halda yamasa sharshaǵan halda rulge otırmań;
✅ Piyadalarǵa jol beriń hám piyadalar ótiw ornında abaylı bolıń;
✅ Balalardı jollarda qadaǵalawsız qaldırmań;
✅ Transport qurallarında qáwipsizlik remenlerinen bárqulla paydalanıń;
✅ Telefondan paydalanıp dıqqatıńızdı aljastırmań;

Áziz watanlaslar!
Hár birińizdiń sanalı hám juwapkershilikli múnásibetińiz arqalı, kóplegen baxıcız hádiyselerdiń aldın alıw múmkin.
Joldaǵı tártip - turmısımız qáwipsizliginiń tiykarǵı kepili.
Ózińizdi hám jaqınlarıńızdı asırań!
Jollarda abaylı bolıń - ómirińizdi qádirleń!
Sebebi, jol qaǵıydası - ómir paydası.

Itibarlarıńız ushın raxmet!
Telegram (https://t.me/press_Amuwdarya) | Instagram (https://www.instagram.com/press_amuwdarya/) | Facebook (https://www.facebook.com/amudaryotumani.hokimligi/) |  Sayt (https://gov.uz/oz/amiwdarya)