Ámiwdárya rayonında shigit egiw jumısların sapalı shólkemlestiriw boyınsha áhmiyetli seminar ótkerildi
2026-03-26 10:05:00 / Министрлик
Bıyılǵı jıldıń ónimi ushın shigit egiw jumısların sapalı hám sistemalı shólkemlestiriw maqsetinde Ámiwdárya rayonı "Aq altın" APJ aymaǵında jaylasqan "Saparbaev Qadir" fermer xojalıǵında ámeliy seminar shólkemlestirildi.
Seminarǵa Qaraqalpaqstan Respublikası Ministrler Keńesiniń Baslıǵı Farxod Ermanov qatnastı. Sonday-aq, barlıq rayon hákimleri, rayonlarǵa biriktirilgen juwapker wákiller, rayon hákimleriniń awıl hám suw xojalıǵı máseleleri boyınsha orınbasarları, tarawǵa baylanıslı shólkem hám uyımlardıń basshıları qatnastı.
Seminar dawamında qánigeler tárepinen shigit egiw procesin agrotexnikalıq talaplar tiykarında shólkemlestiriw, jerlerdi sapalı tayarlaw, zamanagóy texnika hám innovaciyalıq kózqaraslardan nátiyjeli paydalanıw, suw resurslarınan aqılǵa uǵras paydalanıw hám joqarı ónimdarlıqqa erisiw faktorları boyınsha tolıq túsinikler berildi.
Sonday-aq, dala sharayatında ámeliy kórgizbeli shınıǵıwlar ótkerilip, shigitti egiw texnologiyası, texnikalardıń sazlıǵı hám olardı durıs basqarıw máseleleri ámelde kórsetip berildi. Qatnasıwshılar ózlerin qızıqtırǵan sorawlarǵa qánigelerden hár tárepleme juwaplar aldı.
Seminar juwmaǵında juwapkerlerge aymaqlarda shigit egiw jumısların óz waqtında, sapalı hám belgilengen agrotexnikalıq múddetlerde ámelge asırıw, bar imkaniyatlardan tolıq paydalanıw hám qadaǵalawdı kúsheytiw boyınsha tiyisli kórsetpeler berildi.
Bul seminar awıl xojalıǵında nátiyjelilikti arttırıw, zúráátlilik kórsetkishlerin jaqsılaw hám bıyılǵı paxta máwsimin tabıslı shólkemlestiriwde úlken áhmiyetke iye.