Tolqın awılında Nawrız keypiyatı
2026-03-24 16:00:00 / Министрлик
Tolqın awılında báhárdiń eń gózzal hám áyemgi bayramı - Nawrız ulıwma xalıqlıq seyil sıpatında kóterińki ruwxta keńnen belgilendi. Awıldaǵı 33-sanlı ulıwma bilim beriw mektebinde mektep administraciyası, pidayı muǵallimler hám qábiletli oqıwshılar tárepinen mazmunlı hám umıtılmas bayram baǵdarlaması shólkemlestirildi.
Bayram ilajına ata-analar, máhálle belsendileri hám keń jámiyechilik wákilleri mirát etildi. Milliy qádiriyatlarımız sáwlelengen naǵıslar, ráńbáreń lipaslar hám túrli milliy taǵamlar menen toltırılǵan dasturxanlar hámmege bayram keypiyatın baǵıshladı.
Balalardıń tákirarlanbas saxnalıq shıǵıwları, tartımlı ayaq oyınları, kewilge jaqın nama-qosıqları Nawrız keypiyatın jáne de janlandırıp, tamashagóylerge umıtılmas tásirler baǵıshladı.
Nawrız - bul jańalanıw, miyrim-shápáát hám birlik belgisi. Bul bayram Tolqın awılı xalqınıń awızbirshiligin, jaqsı niyetlerin hám keleshekke bolǵan isenimin jáne bir márte bekkemledi.