Máhálle - jámiyet tayanıshı, insan qádiriniń ólshemi
2026-03-23 17:50:00 / Министрлик
Ámiwdárya rayonında 22-mart kúni "Máhálle sisteması xızmetkerleri kúni" múnásibeti menen saltanatlı bayram keshesi shólkemlestirildi. Bul ilaj elimizde máhálle institutına qaratılıp atırǵan joqarı itibardıń jáne bir ayqın kórinisine aylandı. Rayondaǵı "Diamond" restoranında shólkemlestirilgen bul ilaj tek ǵana bayram keypiyatı emes, al tán alıw hám húrmet úylesimi menen ajıralıp turdı.
Ilajda rayon hákimi Sabır Xojametov, rayon prokurorı Bahram Masharipov, hákim orınbasarları, bólim hám shólkemlerdiń basshıları qatnasıp, máhálle sisteması xızmetkerlerin qızǵın qutlıqladı. Olardıń pidákerlik miyneti, xalıq penen birge jasap, mashqalalardı ornında sheshiwge umtılıp atırǵan háreketleri ayrıqsha atap ótildi.
Saltanatlı ilaj dawamında óziniń pidayılıǵı, intakerligi hám nátiyjeli jumısı menen ajıralıp turǵan bir topar xızmetkerler rayon hákiminiń minnetdarshılıq xatları hám estelik sawǵaları menen sıylıqlandı. Bul bolsa taraw wákillerine berilgen joqarı baha, olardıń miynetine kórsetilgen húrmettiń kórinisi boldı.
Bayram keshesi kórkem óner hám mádeniyat xızmetkerleri tárepinen tayarlanǵan koncert baǵdarlaması menen dawam etip, qatnasıwshılarǵa kóterińki keypiyat baǵıshladı.