"Nawrızdı ulıǵlaw - insandı ulıǵlaw bolıp esaplanadı
2026-03-18 18:05:00 / Министрлик
Ámiwdárya rayonında báhárdiń eń gózzal áyyyamı - Nawrız ulıwmaxalıqlıq bayramı kóterińki ruwx, joqarı dárejede hám milliy qádiriyatlarımızǵa tán dástúrler tiykarında keńnen belgilendi.
Doslıq máhállesi aymaǵındaǵı Vaxum elatında jaylasqan balalar oyın maydanı bayramnıń oraylıq ornına aylandı. Bul jerde xalqımızdıń bay milliy taǵamları, báhárgi ónimler menen bezelgen dasturqanlar jayılıp, miymandoslıq hám keńpeyillik ortalıǵı jáne de ayqın kórindi.
Bayram dawamında milliy úrp-ádetlerimizdi sáwlelendiretuǵın saxnalıq kórinisler, túrli millet wákilleriniń awızbirshiligin sáwlelendiretuǵın shıǵıwlar, báhár, Watan, jańalanıw hám baxıttı jırlaytuǵın qosıqlar hám tartımlı ayaq oyınlar tamashagóylerge umıtılmas máwritlerdi sawǵa etti. Belgili kórkem óner sheberleriniń qatnasıwındaǵı koncert baǵdarlaması bolsa bayramǵa jáne de kóterińkilik baǵıshladı.
Sonday-aq, bayram ilajları sheńberinde arqan tartıw, tas kóteriw, milliy gúres sıyaqlı áemgi oyınlar hám sport jarısları shólkemlestirilip, qatnasıwshılar arasında salamat báseki hám kóterińki keypiyat payda boldı.
Bul bayram saltanatlarında respublika hám rayon kólemindegi basshılar, túrli kárxana hám shólkemlerdiń juwapkerleri, bilimlendiriw mákemeleriniń wákilleri hám keń jámiyechilik belsene qatnastı.
Nawrız - bul tek ǵana tábiyattıń oyanıwı emes, al kewillerdiń pákleniwi, mehir-múriwbet, insan qádiri hám awızbirshiliktiń saltanatı bolıp esaplanadı. Ámiwdárya rayonında ótkerilgen bul bayram mine usı iygilikli qádiriyatlardıń ayqın kórinisi boldı.
Jańa kúnler, jańa úmitler, jańa shekler múbárek bolsın! Nawrız bayramıńız múbárek bolsın!