Ámiwdárya rayonında 8-mart - Xalıqaralıq hayal-qızlar kúni múnásibeti menen saltanatlı bayram ilajı ótkerildi
2026-03-06 17:50:00 / Министрлик
Ámiwdárya rayonında 8-mart - Xalıqaralıq hayal-qızlar kúni múnásibeti menen kóterińki ruwxta bayram ilajı shólkemlestirildi. Rayonlıq Mádeniyat bóliminde ótkerilgen bul ilajda hár qıylı tarawlarda nátiyjeli miynet etip kiyatırǵan belsendi hayal-qızlar, jámiyechilik wákilleri hám nuraniy analar qatnastı.
Ilajdı rayon hákiminiń orınbasarı Nodirbek Kamolov ashıp berip, barlıq hayal-qızlardı usı ullı hám húrmetli bayram menen qızǵın qutlıqladı. Óz qutlıqlawında hayal-qızlardıń jámiyetlik turmıstaǵı ornı sheksiz ekenin, olardıń shańaraqta mehir hám tárbiya ornı, jámiyette bolsa pidayı hám intaker kúsh sıpatında ayrıqsha qádirlenetuǵının atap ótti.
Ilaj dawamında jámiyetlik turmısta belsene qatnasıp, óziniń miynet súygishligi, intakerligi hám pidayılıǵı menen basqalarǵa úlgi bolıp kiyatırǵan bir topar hayal-qızlar rayon hákiminiń minnetdarshılıq xatı hám estelik sawǵaları menen sıylıqlandı. Bul bolsa olardıń miynetine berilgen joqarı itibar hám húrmettiń jáne bir kórinisi boldı.
Sonday-aq, ilajda qatnasıp atırǵan barlıq hayal-qızlarǵa bayram múnásibeti menen estelik sawǵaları tapsırılıp, olarǵa qızǵın tilekler bildirildi.
Bayram ilajı rayonlıq Mádeniyat bólimi dóretiwshileri tárepinen tayarlanǵan ráńbáreń koncert baǵdarlaması menen dawam etti. Koncert dawamında báhár, gózzallıq, ana, hayal hám muhabbattı jırlaytuǵın qosıqlar, dilbar ayaq oyınlar hám qızıqlı saxnalıq kórinisler kórsetilip, jıynalǵanlarǵa kóterińki keypiyat baǵıshladı.