Ámiwdárya rayonında jáne bir zamanagóy bilimlendiriw dárgayı paydalanıwǵa tapsırıldı
2026-02-28 15:10:00 / Министрлик
Ámiwdárya rayonı Chaykól awılında jaylasqan 59-sanlı ulıwma bilim beriw mektebiniń jańa zamanagóy qosımsha oqıw imaratı hám sport zalınıń saltanatlı ashılıw máresimi bolıp ótti.
Ilajda rayon hákiminiń birinshi orınbasarı Fahriddin Yusupov, Mektepke shekemgi hám mektep bilimlendiriwi bóliminiń baslıǵı Yalǵash Shomuratov hám keń jámiechilik wákilleri qatnasıp, máhálle xalqın hám mektep jámáátin usı quwanıshlı waqıya menen qızǵın qutlıqladı.
"Shaykól" APJ aymaǵındaǵı 59-sanlı ulıwma orta bilim beriw mektebinde jumıstı bólip alıp islewshi "Ámiwdárya xızmet kórsetiw orayı" JShJ tárepinen bahası 4 mlrd 687 mln sum bolǵan qurılıs jumısları ámelge asırıldı.
Nátiyjede:
- 180 oqıwshıǵa mólsherlengen 2 qabatlı qosımsha oqıw imaratı.
- 12×24 ólshemdegi zamanagóy sport zalı
paydalanıwǵa tapsırıldı.
Jańa imaratta inklyuziv bilimlendiriw talapları tiykarında arnawlı lift ornatılıp, barlıq oqıwshılar ushın teńdey imkaniyatlar jaratıldı.
Ísıtıw sisteması zamanagóy chiller-fankoil úskeneleri tiykarında shólkemlestirilgen bolıp, hár bir bólmede temperaturanı óz aldına basqarıw imkaniyatı bar.
Búgingi kúnde mektepte 155 oqıwshı bilim alıp, 28 tájiriybeli pedagog jumıs alıp barmaqta.
Jańa bilimlendiriw hám sport obekti jaslardıń zamanagóy bilim alıwı, fizikalıq jaqtan salamat hám bárkamal áwlad bolıp kamalǵa keliwine xızmet etedi.