Ámiwdárya rayonı Mektepke shekemgi hám mektep bilimlendiriwi bólimine qaraslı, "Bozjap" APJ aymaǵında jaylasqan 68-sanlı ulıwma orta bilim beriw mektebinde keń kólemli dóretiwshilik jumısları ámelge asırıldı. Jumıstı bólip alıp islewshi "QIZKETKEN MAXSUS QURILISH" JSHJ tárepinen bahası 5 mlrd 950 mln sumlıq joybar tiykarında 330 orınǵa mólsherlengen jańa qosımsha oqıw imaratı hám 12×24 ólshemdegi zamanagóy sport zalı qurılıp, paydalanıwǵa tapsırıldı. 

Ashılıw máresiminde Oliy Majlis Nızamshılıq palatası deputatı Sapargúl Utemuratova, rayon hákiminiń orınbasarı Nodirbek Kamalov, máhálle belsendileri hám mektep jámááti qatnastı. Shıǵıp sóylegenler bilimlendiriw tarawında ámelge asırılıp atırǵan reformalar, jaratılıp atırǵan zamanagóy sharayatlar jas áwladtıń bilim alıwı hám bárkamal bolıp kamalǵa keliwinde úlken áhmietke iye ekenin atap ótti.

 Jańa imarat 3 qabattan ibarat bolıp, barlıq zamanagóy talaplarǵa tolıq juwap beredi. Eń áhmiyetlisi, mektepke arnawlı lift ornatılıp, inklyuziv bilimlendiriw talapları tiykarında zárúr sharayatlar jaratıldı. Bul bolsa imkaniyatı sheklengen balalar ushın da sapalı bilim alıw imkaniyatın keńeytedi.

 Házirgi kúnde mektepte 227 oqıwshı tálim-tárbiya almaqta. Olarǵa 27 tájiriybeli pedagog sabaq bermekte.

Jańadan qurılǵan imarat hám sport zalı jaslardıń sapalı bilim alıwı, fizikalıq jaqtan salamat hám hár tárepleme bárkamal bolıp kamalǵa keliwine xızmet etedi. Bilimlendiriw tarawında ámelge asırılıp atırǵan bunday reformalar keleshek áwlad ushın bekkem tiykar bolıp xızmet etpekte.