Mártlikke húrmet, estelikke sadıqlıq: Ámiwdáryada Awǵan urısı veteranlarına joqarı húrmet kórsetildi
2026-02-16 12:05:00 / Министрлик
15-fevral kúni burınǵı Awqam áskerleriniń Awǵanstan aymaǵınan alıp shıǵılǵanına 37 jıl toldı. Usı tariyxıy sáne múnásibeti menen Ámiwdárya rayonında eslew ilajları ótkerildi.
1979-1989-jılları 10 jılǵa shamalas dawam etken áskeriy háreketlerde Respublikadan 3 580 jerlesimiz qatnasıp, óz minnetin maqtanısh penen orınlaǵan. Olardıń mártligi búgingi tınısh kúnlerdiń qádirine jetiwde hám jaslardı watansúyiwshilik ruwxında tárbiyalawda áhmietli orın ieleydi.
Rayonlıq Eslew maydanında ótkerilgen máresimde rayon hákiminiń orınbasarı Nodirbek Kamalov, Qorǵanıw isleri bólimi baslıǵı Shuhrat Mamatov, "Veteran" birlespesi aǵzaları hám keń jámiechilik wákilleri qatnastı. Jawınger-veteranlardıń esteligine ornatılǵan estelikke gúlsheńberler qoyılıp, ótkenlerdiń atına pátiya etildi.
Ilajdıń tiykarǵı bólimi Mańǵıt qalasındaǵı "Diamond" restoranında dawam etti. Veteranlar ushın bayram dasturxanı jayılıp, rayon hákimliginiń minnetdarshılıq xatı hám estelik sawǵaları tapsırıldı. Mádeniyat bólimi kórkem óner sheberleri tárepinen kórsetilgen koncert baǵdarlaması hámmege kóterińki keypiyat baǵıshladı.