Prezident Ámiwdáryalı nuranıy - miynet veteranı Bekman Allabergenovqa qutlıqlaw jolladı
2026-01-05 17:45:00 / Министрлик
Jańa jıl bayramı aldınan Prezidentimiz Shavkat Mirziyoyev elimizdiń rawajlanıwına múnásip úles qosqan, uzaq jıllar dawamında hadal hám pidákerlik penen miynet etip, búgin pensiyaǵa shıqqan bir topar nuranıylarǵa qızǵın qutlıqlaw jolladı. Olardıń arasında Ámiwdárya rayonında jasawshı miynet veteranı, el-jurt húrmetine erisken Bekman Allabergenov ta bar.
Prezident qutlıqlawında nuranıylarımız jámiyetimizdiń biybaha baylıǵı ekeni, olardıń ómir dawamında toplaǵan bay tájiriybesi, ibratlı ómir jolı búgingi jas áwladtı Watanǵa sadıqlıq, miynet súygishlik hám joqarı maqsetlerge ruwxlandıratuǵını ayrıqsha atap ótilgen. Sonday-aq, kóp milletli elimizde tınıshlıq-tatıwlıq, óz-ara húrmet hám awızbirshilik ortalıǵın bekkemlewde nuranıylardıń ornı sheksiz ekeni atap ótilgen.
Usı qutlıqlaw múnásibeti menen Qaraqalpaqstan Respublikası Joqarǵı Keńesiniń komitet baslıǵı Islam Sadıqov hám Ámiwdárya rayonınıń hákimi Sabır Xojametov Bekman Allabergenovtıń shańaraǵında bolıp, Prezidentimizdiń atınan qutlıqlaw xatı hám estelik sawǵaların saltanatlı túrde tapsırdı.
Ushırasıw waqtında nuranıyǵa bekkem densawlıq, uzaq ómir, shańaraǵına tınıshlıq hám abadanlıq tilekleri bildirildi. Bul itibar hám tán alıw Ámiwdáryada miynet veteranlarına kórsetilip atırǵan joqarı húrmet hám ǵamqorlıqtıń ayqın kórinisi boldı.