Ámiwdárya rayonında Awıl xojalıǵı xızmetkerleri kúni múnásibeti menen Zúráát bayramı saltanatlı túrde keńnen belgilendi
2025-12-25 16:15:00 / Министрлик
Miynetke húrmet, zúráátke shúkirshilik!
Rayondaǵı "Jayhun" atındaǵı saltanatlar sarayında taraw pidayıları - fermer hám diyqanlar ushın bayram dasturxanı jayılıp, kóterińki keypiyatta ilaj shólkemlestirildi.
Ilajda Mehriddin Muhammadiev - Ózbekstan Fermerleri keńesi bólim baslıǵı, Anvar Jumanazarov - Joqarǵı Keńestiń Awıl hám suw xojalıǵı máseleleri boyınsha komitet baslıǵı, Abdirov Muratbay - Joqarǵı Keńes baslıǵınıń másláháchisi, sonday-aq, Ámiwdárya rayonı hákimi Sabir Xojametov shıǵıp sóyledi. Sóylewlerde awıl xojalıǵı tarawında pidákerlik penen miynet etip atırǵan fermer hám diyqanlardıń miyneti ayrıqsha atap ótilip, bárshege shın júrekten bayram qutlıqlawları jollandı.
Bayram ilajı dawamında awıl xojalıǵı tarawın rawajlandırıwǵa múnásip úles qosıp kiyatırǵan aldıńǵı fermerler, diyqanlar hám taraw qánigeleri bahalı sawǵalar menen sıylıqlandı. Bul tán alıw olardıń miynetine berilgen joqarı baha boldı.
Sonday-aq, bayram baǵdarlaması sheńberinde respublika hám rayon kólemindegi dóretiwshiler tárepinen nama-qosıqlar atqarılıp, ilaj qatnasıwshılarına umıtılmas máwritler hám joqarı bayram keypiyatı ulastırıldı.
Xosıl bereketi, miynetke húrmet hám keleshekke isenim ruwxında ótken bayram ilajı hámmeniń kewlinde jıllı tásirler qaldırdı.