Puqaralardıń múrájatları - itibarda
2025-12-25 16:10:00 / Министрлик
Ámiwdárya rayonı hákimi Sabır Xojametovtıń puqaralardıń múrájatları boyınsha gezektegi kóshpeli qabıllawı Aq altın awılında shólkemlestirildi. Kóshpeli qabıllaw awıldaǵı 7-sanlı ulıwma bilim beriw mektebi imaratında bolıp ótti.
Bul ushırasıwda Ózbekstan Máhálleler awqamı Ámiwdárya rayonlıq bóliminiń baslıǵı Alisher Yoldashev, tiyisli shólkem hám uyımlardıń basshıları, juwapkerler hám awıl xalqınıń keń jámiyechilik wákilleri qatnastı.
Kóshpeli qabıllaw dawamında puqaralar tárepinen aymaqtı sociallıq-ekonomikalıq rawajlandırıwǵa baylanıslı bir qatar áhmiyetli máseleler kóterildi. Sonıń ishinde, ishki kópirlerdi ońlaw, ishki jollardıń jaǵdayın jaqsılaw, awıl aymaǵında jańa mektepke shekemgi bilimlendiriw mákemesin (baqsha) qurıwǵa talap, kómir ónimlerine talaptıń joqarılıǵı, sonday-aq, xalıqtı jumıs penen támiyinlew máseleleri boyınsha múrájatlar bildirildi.
Rayon hákimi tárepinen hár bir múrájat ayrıqsha tıńlanıp, olardı unamlı sheshiw boyınsha juwapkerlerge anıq tapsırmalar berildi. Ayırım máseleler ornında sheshilgen bolsa, qosımsha úyreniwdi talap etetuǵın múrájatlar boyınsha belgilengen tártipte ilajlar islep shıǵılatuǵını atap ótildi.