Mámleketlik nıshanlarǵa húrmet - muqaddes qádiriyat
2025-11-19 12:20:00 / Министрлик
Ámiwdárya rayonında 18-noyabr - Ózbekstan Respublikası Mámleketlik bayraǵı qabıl etilgen kún múnásibeti menen rayonlıq Mádeniyat bóliminde bayram ilajı bolıp ótti. Ilaj mámleketlik nıshanlarǵa húrmet, watansúyiwshilik hám milliy maqtanıshtı ulıǵlaytuǵın joqarı ruwxta ótti.
Ilajda rayon prokurorı Baxram Masharipov hám rayon hákiminiń orınbasarı Nodirbek Kamalov shıǵıp sóylep, jıynalǵanlardı bayram menen qutlıqladı.
Prokuror Bahram Masharipov óziniń shıǵıp sóylegen sózinde mámleketlik nıshanlardıń huqıqıy hám ruwxıy áhmiyetin, bayraǵımızdıń jáhán arenalarında maqtanısh penen jelbirep turǵanın ayrıqsha atap ótti.
Sonday-aq, rayon hákiminiń orınbasarı Nodirbek Kamolov mámleketlik bayraq xalqımızdıń maqtanıshı ekenin, bayraqtaǵı reńler tınıshlıq, páklik, mártlik hám úmitti ańlatatuǵının esletip, hámmeni 34 jıllıq sáne menen qutlıqladı.
Ilaj Mádeniyat bólimi dóretiwshileri tárepinen tayarlanǵan koncert baǵdarlaması menen dawam etti. Qosıqshılar Watan, doslıq hám tınıshlıqtı jırlaytuǵın qosıqları menen hámmege kóterińki keypiyat ulastı.
18-noyabr - bul tek ǵana tariyxıy sáne emes, al suverenitetimiz, ǵárezsizligimiz hám milliy birligimiz nıshanı.