Hadallıq hám ashıq-aydınlıqtı támiyinlewde jańa kózqaraslar
2025-11-08 10:20:00 / Министрлик
Elimizde korrupciyaǵa qarsı gúresiw mámleketlik siyasattıń tiykarǵı baǵdarlarınan biri sıpatında belgilengen. Bul baǵdarda qabıl etilgen nızam hám normativlik hújjetlerdiń orınlanıwın támiyinlew, mámleketlik basqarıw sistemasında ashıq-aydınlıqtı keńeytiw, hadallıq principlerin bekkemlew boyınsha izbe-iz jumıslar alıp barılmaqta.
Usı maqsette Qaraqalpaqstan Respublikası Ministrler Keńesiniń Korrupciyaǵa qarsı ishki qadaǵalaw bólimi baslıǵı B.Matmuratovtıń qatnasıwında taraw xızmetkerleri menen gezektegi ushırasıw shólkemlestirildi. Ushırasıw dawamında korrupciyaǵa qarsı gúresiwdiń áhmiyetli wazıypaları, huqıqıy mexanizmleri hám xızmetkerlerdiń juwapkershiligin arttırıw máseleleri hár tárepleme dodalandı.
Ushırasıwda mámleketlik uyımlardıń jumısında júzege keliwi múmkin bolǵan korrupciya qáwip-qáterlerin anıqlaw, olardıń aldın alıw, profilaktikalıq ilajlardı kúsheytiw hám xalıqtıń huqıqıy sanasın hám huqıqıy mádeniyatın arttırıw zárúr ekenligi atap ótildi. Sonday-aq, xızmetkerlerge korrupciyaǵa qarsı gúresiwde mawasasız poziciyada bolıw, hadallıqtı kásiplik jumıstıń tiykarǵı ólshemi sıpatında kóriw zárúr ekenligi ayrıqsha esletip ótildi.
Ilaj juwmaǵında taraw wákillerine nızamlılıq, ádillik hám ashıq-aydınlıq principlerin ámelde engiziw boyınsha anıq tapsırma hám kórsetpeler berildi. Bunnan tısqarı, korrupciya jaǵdaylarına jol qoymawda jámiyetlik qadaǵalaw hám puqaralardıń belsene qatnasıwı áhmiyetli faktor ekeni atap ótildi. Bul ushırasıw korrupciyaǵa qarsı gúresiwdi jańa basqıshqa kóteriw, hadallıq hám ashıq-aydınlıqtı támiyinlewde úlken ámeliy áhmiyetke iye.