https://www.youtube.com/watch?v=kqxkuNhfP08&t=3s

Zarbdor tumanida bolajonlar uchun barcha qulayliklarga ega bo‘lgan maktabgacha ta’lim tashkiloti kapital ta’mirlanib foydalanishga topshirildi. Quvonarlisi, endilikda tumanimizdagi yana 210 nafar kichkintoylarga sifatli ta’lim-tarbiya berish imkoni yaratildi.

Zarbdor tumanining "Do‘stlik" mahallasi hududidagi 8-sonli davlat maktabgacha ta’lim tashkiloti 1983-yilda qurilgan bo‘lib, keyingi yillarda anchagina achinarli ahvolga tushib qolgan edi. So‘nggi paytlarda bor-yo‘g‘i 6 ta guruh faoliyat ko‘rsatib, tarbiyachilar soni ham keskin kamayib ketdi. Davlatimiz rahbarining yosh avlod tarbiyasiga jiddiy e’tibor qaratishi sababli, muassasada o‘tgan yilning iyun oyidan e’tiboran kapital ta’mirlash ishlari boshlandi. Bu yerda “Elektr tarmoq” MCHJ quruvchilari tomonidan besh milliard so‘mlik qurilish-ta’mirlash ishlari olib borildi. Bugunga kelib, barcha qulayliklarga ega, zamonaviy, ko‘rkam bino qad rostladi. Natijada guruhlar soni ikki barobarga oshdi. Shu munosabat bilan bu joyda haqiqiy ma’nodagi bayram tadbiri tashkil etildi.

Tashkilotning ochilish marosimida so‘z olgan tuman hokimi Bekzod Tashpulatov ahalliy aholini, qolaversa, tashkilot xodimlari va jajji tarbiyalanuvchilarni yangi bino bilan tabriklab, ushbu muassasadan kelgusida jamiyatimiz rivojiga munosib hissa qo‘shadigan ajoyib kadrlar yetishib chiqishiga ishonch bildirdi. Shuningdek, tuman hokimi ayni paytda hududimizda davlat va nodavlat maktabgacha ta’lim tashkilotlari va tashkil etilayotgan boshqa muassasalar orqali tarbiyalanuvchi bolalar qamrovi kundan-kunga oshib borayotganligini mamnuniyat bilan ta’kidlab o‘tdi.

Tadbirda hozir bo‘lgan keng jamoatchilik, ota-onalar va boshqa mehmonlar tashkilotda yaratilgan shart-sharoitlar bilan tanishishdi.

E’tiborli jihati, "to‘yga to‘yona", deganlaridek, tarbiya muassasasi O‘zbekiston Respublikasi maktabgacha ta’lim vazirligi hamda Zarbdor tuman maktabgacha ta’lim bo‘limi tomonidan tashkilot yangi stol-stul, yotoq krovatlari, yechinish-kiyinish mebellari, oshxona anjomlari, musiqa asboblari, sport inventarlari, gilam va boshqa ko‘plab zaruriy jihozlar bilan ta’minlandi. Keng, yorug‘ xonalar, zamonaviy sport va musiqa zallari, oshxona, yozgi ayvonchalar... bularning barcha-barchasi nafaqat jajji bolajonlarning, balki, ularning ota-onalari, mahalla faollarining ham quvonchiga birdek sabab bo‘ldi, desak aslo mubolag‘a qilmagan bo‘lamiz.

Tadbir so‘nggida mahalla nuroniylari yaxshi niyatlar bilan ta’lim muassasi bog‘iga mevali daraxt ko‘chatlarini ekishdi.