Zafarobod tumanida yangi o‘quv yiliga tayyorgarlik ishlari izchil olib borilmoqda
2026-08-17 17:55:00 / Yangiliklar
Zafarobod tumanidagi umumta’lim maktablari hamda maktabgacha ta’lim muassasalarida 2026–2027 o‘quv yiliga puxta tayyorgarlik ko‘rish maqsadida keng ko‘lamli ishlar amalga oshirilmoqda. Ta’lim muassasalarida olib borilayotgan bunyodkorlik, ta’mirlash va obodonlashtirish tadbirlari yangi o‘quv yilini yuqori saviyada boshlashga xizmat qilmoqda.
Ayni kunlarda maktab va maktabgacha ta’lim tashkilotlarining bino va inshootlarida joriy ta’mirlash ishlari olib borilib, sinf xonalari, guruh xonalari, yo‘laklar hamda yordamchi binolar tartibga keltirilmoqda. Shuningdek, eshik va derazalar ta’mirlanib, muassasalarning ichki va tashqi qismlarida oqlash hamda bo‘yash ishlari bajarilmoqda.
Ta’lim muassasalari hududlarini obodonlashtirishga ham alohida e’tibor qaratilmoqda. Hududlar begona o‘tlardan tozalanib, daraxt va manzarali ko‘chatlar parvarish qilinmoqda, gulzorlar barpo etilib, yashil maydonlar tartibga keltirilmoqda. Bundan tashqari, sport maydonchalari, bolalar o‘yin maydonchalari va boshqa infratuzilma obyektlari ham ko‘zdan kechirilib, zarur ta’mirlash ishlari amalga oshirilmoqda.
Yangi o‘quv yilida o‘quvchilar va tarbiyalanuvchilar uchun qulay hamda xavfsiz sharoit yaratish maqsadida isitish tizimlari, elektr tarmoqlari, ichimlik suvi va sanitariya-gigiyena holati ham nazoratdan o‘tkazilmoqda. Muassasalarning kuz-qish mavsumiga tayyorgarligi bo‘yicha tegishli choralar ko‘rilib, mavjud kamchiliklarni bartaraf etish ishlari davom ettirilmoqda.