Юқори Чирчиқ туманида таълим тизимини янада ривожлантиришга қаратилган муҳим учрашув бўлиб ўтди
2026-07-10 09:00:00 / Yangiliklar
Бугун Юқори Чирчиқ тумани ҳокими Ускенбай Атемов раҳбарлигида туман ҳокимлигида таълим соҳаси вакиллари билан кенгайтирилган йиғилиш ўтказилди.
Учрашувда Мактабгача ва мактаб таълими бўлими масъул ходимлари, умумтаълим мактаблари директорлари, давлат мактабгача таълим ташкилотлари раҳбарлари ҳамда туман техникуми директори иштирок этди.
Йиғилишда Ўзбекистон Республикаси Президентининг ПҚ–1 ва ПҚ–2-сонли қарорлари ижросини таъминлаш, таълим тизимида амалга оширилаётган ислоҳотларнинг мазмун-моҳияти ҳамда уларнинг амалдаги натижалари атрофлича муҳокама қилинди.
Шунингдек, таълим сифатини янада ошириш, ўқувчиларнинг билим ва кўникмаларини мустаҳкамлаш, мактабларда ватанпарварлик руҳини юксалтириш мақсадида ҳар бир таълим муассасасида мактаб тарихи ва унинг ютуқларини акс эттирувчи музейлар ташкил этиш бўйича вазифалар белгилаб берилди.
Йиғилиш давомида 11-синф битирувчиларининг олий таълим муассасаларига ўқишга кириш кўрсаткичлари, белгиланган режаларнинг бажарилиши ҳамда кутилаётган натижалар таҳлил қилинди. Шу билан бирга, 9-синф битирувчиларининг қизиқиш ва қобилиятларидан келиб чиққан ҳолда уларни касб-ҳунар коллежлари ва техникумларга йўналтириш ишларини кучайтириш зарурлиги таъкидланди.
Мажлисда 2026–2027 ўқув йили учун 1-синфларга онлайн қабул жараёнларининг бориши ҳамда бу борада амалга оширилаётган ишлар танқидий-таҳлилий муҳокама қилинди. Шунингдек, умумтаълим мактабларининг янги ўқув йилига тайёргарлиги, қурилиш-таъмирлаш ишлари, моддий-техника базасини мустаҳкамлаш ва таълим муассасаларида муносиб шарт-шароитлар яратиш масалалари ҳам кўриб чиқилди.
Шунингдек, йиғилишда таълим муассасаларида хавфсизлик ва рақамли назорат тизимларини янада такомиллаштириш масалаларига ҳам алоҳида эътибор қаратилди. Хусусан, мактабларни замонавий видеокузатув камералари билан тўлиқ жиҳозлаш, уларнинг узлуксиз ишлашини таъминлаш ҳамда ота-оналарни фарзандларининг мактабга келиши ва дарс машғулотларида иштирок этиши ҳақида SMS-хабарномалар орқали тезкор хабардор қилиш тизимини босқичма-босқич жорий этиш бўйича таклиф ва вазифалар муҳокама қилинди. Қайд этилганидек, бу каби рақамли ечимлар таълим муассасаларида хавфсизликни мустаҳкамлаш, ота-оналар билан ҳамкорликни кучайтириш ва фарзандлар таълими устидан назоратни янада самарали ташкил этишга хизмат қилади.
Учрашув якунида туман ҳокими Ускенбай Атемов томонидан масъулларга белгиланган вазифаларнинг сифатли ва ўз вақтида ижросини таъминлаш, ҳар бир таълим муассасасида тизимли ёндашувни йўлга қўйиш ҳамда ёшларга замонавий ва сифатли таълим бериш бўйича аниқ топшириқлар берилди.
