Deputatlar 2-son oilaviy poliklinikada korrupsiyaga qarshi tizimni o‘rgandi
2026-06-10 10:15:00 / Yangiliklar
Xalq deputatlari Yangiyo‘l shahar Kengashining 16-Qovunchitepa saylov okrugi deputati Sh.Rashidova hamda Korrupsiyaga qarshi kurashish, davlat organlarida ochiqlikni ta’minlash va huquqiy masalalar bo‘yicha doimiy komissiya a’zosi, 2-Yangihayot saylov okrugi deputati D.Ahmedova Yangiyo‘l shahrida korrupsiyadan holi muhitni shakllantirish, aholi o‘rtasida korrupsiyaga nisbatan murosasiz munosabatni kuchaytirish borasida amalga oshirilayotgan ishlarni o‘rganish maqsadida 2-son oilaviy poliklinikada bo‘lishdi.
O‘rganish jarayonida poliklinika rahbariyati hamda korrupsiyaga qarshi kurashish yo‘nalishiga mas’ul xodimlar bilan uchrashuv o‘tkazilib, mazkur yo‘nalishda amalga oshirilayotgan chora-tadbirlar va ularning samaradorligi tahlil qilindi.
Shuningdek, tashrif davomida korrupsiyaga oid huquqbuzarliklarning oldini olish, manfaatlar to‘qnashuviga yo‘l qo‘ymaslik, fuqarolarning huquq va erkinliklari hamda qonuniy manfaatlarini ta’minlash, davlat xizmatlarida ochiqlik va shaffoflik tamoyillariga qat’iy rioya etish masalalari yuzasidan fikr almashildi.
Ta’kidlanganidek, korrupsiyaga qarshi kurashish har bir tashkilot va jamiyatning ustuvor vazifalaridan biri bo‘lib, bu boradagi tizimli ishlarni izchil davom ettirish muhim ahamiyat kasb etadi.