Korrupsiyaga qarshi murosasiz muhitni shakllantirish ishlari davom etmoqda
2026-04-02 14:30:00 / Yangiliklar
Yangiyo‘l shahrida korrupsiyaga qarshi murosasiz muhitni yaratish, hududni jinoyatchilikdan xoli xavfsiz maskanga aylantirish borasida amalga oshirilayotgan kompleks chora-tadbirlar izchil davom etmoqda. Zamonaviy yondashuvlar asosida olib borilayotgan ushbu tizimli ishlar barcha tashkilotlarda belgilangan grafik asosida samarali yo‘lga qo‘yilgan. Navbatdagi muhim uchrashuv Yangiyo‘l shahar hokimi R. Raimov, shahar prokurori E. Sanokulov, shahar Ichki ishlar bo‘limi boshlig‘i E. Sultonov hamda korxona va tashkilotlar rahbarlari ishtirokida o‘tkazildi.
Uchrashuv davomida 2026-yilning dastlabki uch oyi yakunlari sarhisob qilinib, korrupsiyaga qarshi kurashish yo‘nalishida amalga oshirilgan ishlar chuqur tahlil qilindi. Shuningdek, mavjud kamchiliklar ochiq muhokama qilinib, kelgusida ustuvor vazifalar va aniq choralar belgilab olindi. Mas’ullar tomonidan korrupsiyaga qarshi kurashishda faqat nazorat bilan cheklanib qolmasdan, profilaktika choralarini kuchaytirish, aholining huquqiy madaniyatini oshirish hamda ochiqlik va shaffoflik tamoyillarini keng joriy etish zarurligi alohida ta’kidlandi.
Ta’kidlanganidek, mazkur yo‘nalishda olib borilayotgan ishlar tizimli davom ettirilib, har bir rahbar va mas’ul xodim zimmasiga yuklatilgan vazifalarning ijrosi qat’iy nazoratga olinadi.