Namanganda “Shotakan karate-do” bo‘yicha an’anaviy xalqaro ochiq turnirga start berildi.
2026-06-10 11:30:00 / Yangiliklar
65-xalqaro «Gullar festivali” nishonlanayotgan ushbu kunlarda "Shotokan Karate-do" bo‘yicha navbatdagi ochiq turnirga start berildi. Shu munosabat bilan Yangi Namangan tumanidagi «Pahlavon” majmuasida viloyat jamoatchiligi, sportsevarlar jam bo‘ldilar.
Namangan viloyati hokimi Shavkatjon Abdurazzoqov tabrik so‘zida keyingi yillarda muhtaram Prezidentimiz boshchiliklarida barcha sohalar qatori sportni rivojlantirishga ham alohida e’tibor qaratilayotgani, ayniqsa, yoshlarga yetarli shart-sharoitlar yaratish borasida tizimli ishlar amalga oshirilayotgani haqida to‘xtalib, xalqaro turnir ishtirokchilariga omad tiladi.
«Shotakan karate-do”ni rivojlantirishga qo‘shgan hissasi uchun bir qator faollar rag‘batlantirildi.
Shundan so‘ng, Davlatimiz madhiyasi ijro etildi va yosh gimnastikachilar hamda karatechilarning ko‘rgazmali chiqishlari bo‘lib o‘tdi. Musobaqani rasman 6-7 yoshli qatnashchilar boshlab berishdi.
Ta’kidlash joiz, xalqaro ochiq turnirda mamlakatimiz viloyatlari hamda qo‘shni Qirg‘iz, Tojikiston Respublikalaridan kelgan 6 yoshdan 18 yoshgacha bo‘lgan bolalar va o‘smirlar kuch sinashmoqdalar. Bellashuvlar xalqaro standartlar talabi bo‘yicha malakali hakamlar tomonidan baholab borilmoqda.
Namangan viloyati hokimligi Axborot xizmati