Yangi Namanganda iqtisodiy faollik: eksport va investitsiyalarda o‘sish kuzatilmoqda
2026-04-07 20:05:00 / Rahbariyatning bayonotlari va nutqlari
Yangi Namangan tumanida 2026-yilning dastlabki oylari iqtisodiy ko‘rsatkichlar ijrosida ijobiy natijalarni namoyon etmoqda. Xususan, investitsiya dasturlari ijrosi tumandagi iqtisodiy faollikni oshirishda muhim omil bo‘lmoqda. Joriy yilda umumiy qiymati 1 trln 375,3 mlrd so‘m bo‘lgan 110 ta loyihani amalga oshirish orqali 4 mingdan ortiq yangi ish o‘rni yaratish rejalashtirilgan. Bugungi kunga qadar 38 ta loyiha ishga tushirilib, ming nafarga yaqin aholi ish bilan ta’minlandi.
Shu bilan birga, xorijiy investitsiyalarni jalb qilish borasida ham ijobiy dinamika saqlanmoqda. Birinchi chorak yakuniga ko‘ra, rejalashtirilgan ko‘rsatkich ortig‘i bilan bajarilib, 96,7 mln dollarlik to‘g‘ridan-to‘g‘ri xorijiy investitsiyalar o‘zlashtirildi.
Eksport yo‘nalishida ham belgilangan yillik reja doirasida birinchi chorak holatiga 10,25 mln dollarlik mahsulot tashqi bozorlarga yetkazib berilgan. Ushbu ko‘rsatkichning asosiy qismi sanoat mahsulotlari hissasiga to‘g‘ri kelmoqda.
Mazkur natijalar tumanda ishbilarmonlik muhitini yaxshilash, ishlab chiqarish quvvatlarini kengaytirish va yangi ish o‘rinlari yaratish borasida amalga oshirilayotgan tizimli ishlar samarasi hisoblanadi.
Yangi Namangan tumani hokimligi axborot xizmati