Yangiqo‘rg‘onda sudlar va Favqulodda vaziyatlar bo‘limi uchun yangi ma’muriy binolar qurilmoqda
2026-09-08 09:10:00 / Yangiliklar
Yangiqo‘rg‘on tumanida zamonaviy infratuzilmani shakllantirish, davlat tashkilotlari uchun munosib ish sharoitlarini yaratish maqsadida bir qator bunyodkorlik ishlari amalga oshirilmoqda.
Bugun tuman hokimining hududlardagi o‘rganishlari davomida «Qorayontoq» mahallasi hududida jinoyat va fuqarolik ishlari bo‘yicha Yangiqo‘rg‘on tuman sudlari uchun barpo etilayotgan yangi ma’muriy bino qurilishi jarayonlari ko‘zdan kechirildi.
Shuningdek, mazkur hududda Favqulodda vaziyatlar tuman bo‘limi uchun ham zamonaviy ma’muriy bino barpo etilmoqda.
O‘rganish davomida obyektlardagi qurilish ishlarining borishi, loyiha asosida yaratilayotgan zamonaviy shart-sharoitlar va inshootlarning kelgusidagi ahamiyati muhokama qilindi.
Qurilish ishlarini sifatli tashkil etish, belgilangan muddatlarda yakunlash hamda obyektlarni foydalanishga tayyor holga keltirish yuzasidan mas’ullarga tegishli ko‘rsatmalar berildi.
Yangi ma’muriy binolarning barpo etilishi davlat xizmatlarini samarali tashkil etish, xodimlar uchun munosib mehnat sharoitlarini yaratish va aholiga xizmat ko‘rsatish sifatini yanada oshirishga xizmat qiladi.
Yangiqo‘rg‘on tumani hokimligi
Axborot xizmati