Qashqadaryo viloyati Yakkabog' tumani hokimligi

Yurtimizda yosh avlodning bilimli, vatanparvar va mustaqil fikrlovchi shaxslar bo‘lib voyaga yetishiga alohida e'tibor qaratilmoqda. Prezidentimiz Shavkat Miromonovich Mirziyoev tashabbusi bilan hamda O‘zbekiston Respublikasi Maktabgacha va maktab ta'limi vazirligi tomonidan o‘quvchilarning mustaqil fikrlash ko‘nikmalarini rivojlantirish, ularda kitobxonlikka bo‘lgan qiziqishni oshirish, ajdodlarimizning boy ma'naviy merosini keng targ‘ib qilish maqsadida tashkil etilgan “Jadidlar izidan” respublika tanlovi mana ikki yildirki izchil ravishda o‘tkazib kelinmoqda. Tanlovning asosiy maqsadi — iqtidorli o‘quvchilarni aniqlash, ularni rag‘batlantirish va qo‘llab-quvvatlash, shuningdek yoshlarning bo‘sh vaqtlarini mazmunli tashkil etish, milliy qadriyatlar, urf-odat va an'analarni yoshlar ongiga singdirishdan iboratdir. “Jadidlar izidan” respublika tanlovi, qolaversa, mustaqillik va ma'rifatparvarlik g‘oyalarini ilgari surgan ajdodlarimiz merosini chuqur o‘rganish, ularning ezgu orzularini davom ettirishga xizmat qiladi. Bugungi tanlovning tuman bosqichi Yakkabog‘ tumanida tantanali ravishda boshlandi. Tadbirni tuman hokimi o‘rinbosari Fozil Xidirov ochib berdi. “Bugungi ‘Jadidlar izidan’ tanlovi yoshlarimizning bilimga, ma'rifatga bo‘lgan intilishini yanada kuchaytiradi. Ushbu loyiha orqali iqtidorli o‘quvchilar aniqlanib, ularning salohiyatini rivojlantirish uchun yanada keng sharoitlar yaratiladi,” — deya ta'kidladi tuman hokimi o‘rinbosari. Tuman bosqichida faol ishtirok etgan o‘quvchilar o‘z bilim va qobiliyatlarini namoyon etib, faxrli o‘rinlarni egallash uchun bellashmoqda. G‘oliblar viloyat va respublika bosqichlarida tumani sharafini himoya qiladilar.