Qashqadaryo viloyati Yakkabog' tumani hokimligi

2025–2026 o‘quv yili uchun Asosiy fan olimpiadasining ikkinchi (tuman) bosqichi Yakkabog‘ tumanida o‘z faoliyatini boshladi. Mazkur bosqichda tumandagi jami umumta'lim maktablarining 9–11-sinf o‘quvchilari ishtirok etmoqda. Olimpiada 13 ta fan yo‘nalishi — matematika, fizika, kimyo, biologiya, informatika, tarix, geografiya, ona tili va adabiyoti, rus tili va adabiyoti, xorijiy tillar, davlat va huquq asoslari kabi fanlar bo‘yicha o‘tkazilmoqda. Fan olimpiadasining asosiy maqsadi — iqtidorli o‘quvchilarni aniqlash, ularning faniga bo‘lgan qiziqishini yanada oshirish, ijodiy va mantiqiy tafakkurini rivojlantirish hamda keyingi bosqichlarga munosib tayyorlashdan iboratdir. Tadbirda tuman hokimining yoshlar siyosati, ijtimoiy rivojlanish va ma'naviy-ma'rifiy ishlar bo‘yicha o‘rinbosari Fozil Xidirov, xalq ta'limi bo‘limi mas'ullari hamda ta'lim muassasalari rahbarlari ishtirok etdilar. Fozil Xidirov o‘z chiqishida yoshlarni samimiy tabriklab, fan olimpiadalari iqtidorli yoshlar uchun o‘z bilim va salohiyatini namoyish etish, shuningdek, yutuqlarga erishish yo‘lida muhim maydon ekanini ta'kidladi. Tadbir davomida barcha ishtirokchilar uchun qulay shart-sharoitlar yaratildi. Tashkilotchilar tomonidan olimpiada jarayonining shaffof va adolatli o‘tishiga alohida e'tibor qaratilgan. Tuman bosqichida g‘oliblikni qo‘lga kiritgan o‘quvchilar keyingi — viloyat bosqichida Yakkabog‘ tumani sharafini munosib himoya qiladilar.