"O‘zbekkosmos" agentligi

Jahon kosmik sanoatining eng yirik tadbirlaridan biri, har yili 10 mingdan ortiq soha ekspertlari, nufuzli kompaniya va korporatsiyalar rahbarlari, olimlar, tadqiqotchilar, innovator hamda agentliklarni bir maydonda jamlovchi, ramziy ma’nodagi kosmos eksposiga bu yil 29–sentabr va 3–oktabr kunlari Avstraliyaning Sidney shahri mezbonlik qilmoqda.   

Bu yilgi kongres ko‘plab dolzarb yo‘nalishlarni qamrab olgani bilan ahamiyatlidir. Xususan, sun’iy yo‘ldoshlar orqali iqlim o‘zgarishlari, tabiiy ofatlar va ekologik muammolarni kuzatish, kosmosdagi chiqindilarni kamaytirish va orbital muhitni muhofaza qilish, kichik sun’iy yo‘ldoshlar, navigatsiya tizimlari, kosmik aloqa va energiya manbalaridagi yangiliklar, kosmos huquqi, xalqaro kelishuvlar, barqaror hamkorlik masalalari va yoshlarni kosmos sohasiga jalb qilish, ta’lim dasturlari hamda jamiyatda kosmos ilmining ahamiyati kabi mavzular shular jumlasidandir. 

Minglab delegatlar qatori “O’zbekkosmos” agentligi vakillari ham mazkur xalqaro International Astronautical Congress – 2025’da maxsus stend va taqdimotlar bilan ishtirok etishmoqda. Ularda O’zbekistonning kosmik sohadagi loyihalari, xususan, ijtimoiy – iqtisodiy yo‘nalishlar rivojida kosmik texnologiyalardan foydalanish bo‘yicha amalga oshirilgan unikal dasturlar, kosmik ta’lim va xalqaro hamkorlik borasidagi yechimlar o’rin olgan. 

Shuningdek, “O’zbekkosmos” agentligi vakillari 29–sentabr va 3–oktabr kunlari 

IAC-2025 doirasidagi texnik sessiyalar, yalpi majlislar, davra suhbatlari, forum va ko‘plab uchrashuvlarda ishtirok etishlari ham belgilangan.