Assalomu alaykum hurmatli faxriylar! Uchquduq tumani ichki ishlar organlari xodimlari!  Sizlarni  kuni-kecha nishonlangan  — Ichki ishlar organlari xodimlari kuni bilan chin qalbimdan samimiy muborakbod etaman!
 Jamiyatda qonun ustuvorligini ta’minlash, fuqarolarning huquq va erkinliklarini himoya qilish,  jinoyatchilikning oldini olish hamda aholi osoyishtaligini ta’minlashdek g‘oyat mas’uliyatli vazifani sharaf bilan ado etib kelayotgan barcha soha fidoyilarining mehnati e’tirofga munosib, albatta!
  Zero, tinchlik va osoyishtalik bor joyda taraqqiyot, bunyodkorlik va farovonlik bo‘ladi.
  Bugun yurtimizda jamoat xavfsizligini ta’minlash, huquqbuzarliklarning barvaqt oldini olish, fuqarolarning qonuniy manfaatlarini himoya qilish va ichki ishlar organlarining aholi bilan hamkorligini yanada mustahkamlashga alohida e’tibor qaratilmoqda. Bu jarayonda profilaktika ishlarini manzilli tashkil etish, har bir mahalladagi kriminogen vaziyatni chuqur tahlil qilish, jinoyatchilikka sabab bo‘layotgan omillarni aniqlash va ularni bartaraf etish muhim ahamiyat kasb etmoqda.
  Jumladan, Uchquduq tumanida ham huquq-tartibotni mustahkamlash, jinoyatchilikning oldini olish va aholi xavfsizligini ta’minlash borasida ichki ishlar organlari,  tegishli tashkilotlar hamda keng jamoatchilik hamkorligida muayyan ishlar amalga oshirilmoqda.
  2026 yilning o‘tgan to‘qqiz oyi yakunlari mazkur yo‘nalishdagi faoliyatni yanada takomillashtirish zarurligini ko‘rsatmoqda. Joriy yilda 99 ta jinoyat qayd etilgan bo‘lib, bu ko‘rsatkich 2025 yilning mos davriga nisbatan 30 taga yoki 43,5 foizga oshgan. Mazkur raqamlar jinoyatchilikka qarshi kurashishda mavjud yondashuvlarni qayta ko‘rib chiqish, profilaktika choralarining ta’sirchanligini oshirish va har bir huquqbuzarlikning oldini olishga qaratilgan tizimli ishlarni kuchaytirish lozimligini anglatadi.
  Shuningdek, oldini olish mumkin bo‘lgan jinoyatlar soni 31 tani tashkil etgan. Bu esa huquqbuzarliklarning kelib chiqish sabablarini chuqur o‘rganish, xavf guruhidagi shaxslar bilan individual ishlash, oilaviy va ijtimoiy muammolarni o‘z vaqtida hal etish hamda profilaktik choralarning natijadorligini oshirishni dolzarb vazifa sifatida kun tartibiga qo‘yadi.
  Ayniqsa, o‘g‘irlik, bezorilik, og‘ir turdagi jinoyatlar, jinoyat-qidiruv yo‘nalishidagi holatlar hamda yo‘l-transport hodisalarining ko‘payishi tegishli idoralar oldiga aniq vazifalarni qo‘ymoqda. Bunday holatlarning oldini olishda faqat sodir etilgan jinoyatlarga nisbatan chora ko‘rish bilan cheklanib qolmasdan, ularni keltirib chiqaruvchi shart-sharoitlarni bartaraf etish, huquqiy targ‘ibotni kuchaytirish hamda fuqarolarning qonunga hurmatini oshirishga qaratilgan chora-tadbirlarni izchil amalga oshirish talab etiladi.
  Shu bilan birga, firibgarlik va iqtisodiyotga oid ayrim jinoyatlar sonining kamaygani  shuningdek, bosqinchilik, tovlamachilik, nomusga tegish, transport vositasini olib qochish va qasddan odam o‘ldirish jinoyatlarining qayd etilmagani profilaktika va huquqni muhofaza qilish borasidagi faoliyatda ijobiy jihatlar ham mavjudligini ko‘rsatadi.
  Vazirlar Mahkamasining 2025 yil 1 dekabrdagi qarori ijrosi doirasida «Obod va xavfsiz mahalla» tamoyili asosida «Xavfsiz va sog‘lom yurt» tadbiri o‘tkazilmoqda. Mazkur tadbir doirasida amalga oshirilayotgan profilaktik chora-tadbirlar, huquqbuzarliklarning barvaqt oldini olish va aholi bilan manzilli ishlash ishlari jinoyatchilikni kamaytirishga xizmat qilmoqda. Jumladan,  14 ta mahallaning 3 tasida jinoyatlar soni kamaygan, 2 tasida barqaror holat saqlangan. “Kokayaz” ovul fuqarolar yig‘inida esa jinoyat qayd etilmagan. Lekin 8 ta mahalla va ovul fuqarolar yig‘inida oshgan.
  Ushbu raqamlar har bir mahalla va ovul fuqarolar yig‘inlarining o‘ziga xos xususiyatlaridan kelib chiqib, profilaktika ishlarini tashkil etish, muammoli hududlarda mas’ullarning javobgarligini oshirish va jamoatchilik nazoratini kuchaytirish lozimligini ko‘rsatadi.
 Ayni paytda «Obod va xavfsiz mahalla» tamoyili asosida ijtimoiy profilaktika tizimini takomillashtirish, fuqarolarning huquqiy madaniyatini yuksaltirish va jamoat xavfsizligini ta’minlashga qaratilgan chora-tadbirlarning ahamiyati ortib bormoqda.
 Shu bois profilaktika ishlarini faqat huquqni muhofaza qiluvchi idoralarning vazifasi sifatida emas, balki butun jamiyatning umumiy mas’uliyati sifatida qabul qilishimiz zarur.
Hurmatli ichki ishlar organlari xodimlari!
Sizlarning kasbingiz katta mas’uliyat, mustahkam iroda, qat’iyat va fidoyilikni talab etadi. Xizmat vazifangizni bajarish jarayonida turli qiyinchiliklarga duch kelsangiz-da, xalq osoyishtaligi va qonun ustuvorligini ta’minlash yo‘lidagi sa’y-harakatlaringiz bilan yurtdoshlarimiz ishonchini qozonib kelmoqdasiz.
  Ishonchim komilki, hududda huquq-tartibotni mustahkamlash, jinoyatchilikning oldini olish va aholi xavfsizligini ta’minlash borasidagi ishlarni yanada samarali tashkil etishda  o‘z bilim va tajribangiz, kasbiy mahoratingiz hamda vatanparvarlik fazilatlaringizni to‘liq namoyon etasiz, albatta!.
  Fursatdan foydalanib, ichki ishlar organlarida ko‘p yillar samarali xizmat qilib, bugungi kunda faxriylar safida bo‘lgan insonlarga ham chuqur ehtiromimizni bildiramiz.
  Barchangizni kasb bayramingiz bilan yana bir bor samimiy tabriklayman! Sizlarga mustahkam sog‘liq, oilaviy xotirjamlik, baxt-saodat, sharafli va mas’uliyatli faoliyatingizda ulkan muvaffaqiyatlar tilayman.
  Qonun ustuvorligi, aholi manfaati va inson qadrini ta’minlash yo‘lidagi fidokorona xizmatingizda doimo omad va zafarlar yor bo‘lsin!

E’tiboringiz uchun raxmat!