Uchquduq tumanida ko‘p kvartirali uy-joylarda 2026–2027-yillar kuz-qish mavsumini betalafot va barqaror o‘tkazish, aholiga uzluksiz hamda sifatli kommunal xizmatlar ko‘rsatish bo‘yicha tayyorgarlik ishlari tizimli ravishda olib borilmoqda.
  Shu maqsadda Qurilish va uy-joy kommunal xo‘jaligi vazirligi, Navoiy viloyati Qurilish va uy-joy kommunal xo‘jaligi sohasidagi inspeksiyaning mas’ul xodimlari, Uchquduq tuman bo‘limi mas’ul vakillari hamda  boshqaruv servis kompaniyalari rahbarlari va mas’ul xodimlari ishtirokida yig‘ilish o‘tkazildi.
  Unda ko‘p kvartirali uy-joylarni kuz-qish mavsumiga tayyorlash jarayoni, mavsum davomida aholiga kommunal xizmatlarni barqaror ko‘rsatish uchun zarur shart-sharoitlarni yaratish, mavjud muammolarni o‘z vaqtida aniqlash va bartaraf etish masalalari muhokama qilindi.
  Yig‘ilishda, avvalo, ko‘p kvartirali uylarning muhandislik-kommunikatsiya tarmoqlari, umumiy foydalanishdagi joylari va mavsumga tayyorgarlik holatini yana bir bor ko‘zdan kechirish, aniqlangan kamchiliklarni belgilangan muddatlarda bartaraf etish zarurligi ta’kidlandi.
Shuningdek, 2026 yilda boshqaruv servis kompaniyalari hisobidan amalga oshirilishi belgilangan dastur doirasidagi vazifalarni sifatli va o‘z vaqtida bajarish masalasiga alohida e’tibor qaratildi.
  Aholi bilan munosabatlarni yanada yaxshilash, majburiy badal to‘lovlari bo‘yicha mavjud qarzdorlikni kamaytirish va to‘lov intizomini mustahkamlash ham kun tartibidagi muhim masalalardan bo‘ldi. Bunda aholiga ko‘rsatilayotgan xizmatlarning sifati, bajarilayotgan ishlar haqida xabardor qilish va boshqaruv servis kompaniyalarining mas’uliyatini oshirish zarurligi qayd etildi.
   Avariya holatlariga tezkor munosabat
  Kuz-qish mavsumida ko‘p kvartirali uylarda yuzaga kelishi mumkin bo‘lgan avariya holatlarini tezkor bartaraf etish, aholi murojaatlariga zudlik bilan munosabat bildirish maqsadida «Uchquduq Duru Gavhari Kommunalchi» MCHJ boshqaruv servis kompaniyasida avariya-dispetcherlik xizmati tashkil etilgan.
  Mazkur xizmat Uchquduq tumani hududidagi ko‘p kvartirali uy-joylar bo‘yicha murojaatlarni 24/7 rejimida, ya’ni sutka davomida uzluksiz qabul qiladi.
     Avariya va kommunal xizmatlar bilan bog‘liq murojaatlar uchun:
☎️ 79-593-10-72  raqami orqali murojaat qilish mumkin.
  Tegishli mas’ullar tomonidan murojaatlarni qabul qilish, qayd etish va ularning ijrosini ta’minlash jarayonlari doimiy nazoratga olingan.
   Navbatchilik xizmati tayyorgarligi o‘rganildi
  O‘rganishlar davomida avariya-dispetcherlik xizmatining mavsumga tayyorgarlik holati ham ko‘rib chiqildi. Xususan, tun-kun navbatchilik asosida faoliyat yurituvchi guruhlarning shayligi, avariya holatlarida foydalaniladigan texnik vositalar, zarur ehtiyot qismlar va asbob-uskunalar bilan ta’minlanganlik darajasi o‘rganildi.
  Shu bilan birga, aholidan kelib tushayotgan murojaatlarni qayd etish, mas’ullarga yetkazish va belgilangan muddatlarda ijrosini ta’minlash tezkorligiga ham alohida e’tibor qaratildi.
O‘rganish natijalari bo‘yicha xizmat ko‘rsatish sifatini yanada oshirish, avariya holatlariga tezkorlik bilan munosabat bildirish, murojaatlarning yechimini nazorat qilish va aholiga qulay shart-sharoit yaratish yuzasidan mas’ullarga tegishli ko‘rsatma va topshiriqlar berildi.
  Tayyorgarlik ishlari davom etmoqda
  Ayni paytda Uchquduq tumanidagi ko‘p kvartirali uy-joylarning 2026–2027-yillar kuz-qish mavsumiga tayyorgarlik holatini o‘rganish ishlari davom etmoqda.
 Asosiy e’tibor uy-joylarda mavsumni barqaror o‘tkazish uchun zarur muhandislik-kommunikatsiya tarmoqlarining sozligi, umumiy foydalanishdagi hududlarning holati, avariya holatlariga tayyorlik, xizmat ko‘rsatish sifati va aholi murojaatlarini o‘z vaqtida ko‘rib chiqishga qaratilmoqda.
   Belgilangan vazifalarning o‘z vaqtida va sifatli bajarilishi ko‘p kvartirali uy-joylarda yashovchi aholining kuz-qish mavsumini osoyishta o‘tkazishi, kommunal xizmatlar uzluksizligini ta’minlash va mavsumiy muammolarning oldini olishda muhim ahamiyat kasb etadi.

UCHQUDUQ TUMAN HOKIMLIGI AXBOROT XIZMATI.