Farg'ona viloyati Uchko'prik tumani hokimligi

Муҳтарам Президентимиз Шавкат Миромонович Мирзиёев раҳнамолигида кўп миллатли, аҳил ва ҳамжиҳат халқимиз эртанги кун истиқболи йўлида дадил одимлаб бормоқда. Мамлакатимиз тараққиётининг янги босқичида амалга оширилаётган ҳаётбахш ислоҳотлар ҳаётимизнинг барча жабҳаларида тобора кенг қулоч ёзиб, бу борадаги муштарак мақсадлар ижобатини таъминлашга хизмат қилаётир.

Бу хусусда гап кетганда, йилдан-йилга жаҳон ҳамжамиятида ўз мавқеини мустаҳкамлаб бораётган Янги Ўзбекистоннинг кенг кўламли ютуқ ва марраларида туманимиз аҳлининг ҳам муносиб ҳиссаси борлигини алоҳида эътироф этиб ўтиш ўринлидир. Бундан ҳар қанча ғурурлансак арзийди, албатта.

Афсуски, бугун орамизда кундалик фаолиятида ҳалолликни унутиб, коррупция балоси туфайли жамият тараққиётига ғов бўлаётган кимсалар ҳам учраб турибди. Коррупция давлатнинг сиёсий-иқтисодий ривожланиши ҳамда жамиятимизнинг равнақига жиддий путур етказадиган иллатдир. Бу иллат давлатнинг конституциявий асослари ва қонун устуворлиги тамойилларини заифлаштиради. Пировардида инсон ҳуқуқ ва эркинликлари поймол қилинишига сабаб бўлади.

Президентимиз раислигида Коррупцияга қарши курашиш миллий кенгашининг жорий йил 5 март куни бўлиб ўтган йиғилишида юртимизда ушбу иллатдан холи муҳит яратиш бўйича қилинган ишлар таҳлилий-танқидий руҳда сарҳисоб этилиб, долзарб ва устувор вазифалар белгилаб берилди. Ана шу вазифалардан келиб чиқиб, айни пайтда коррупцияни келтириб чиқарувчи барча омилларга қарши жиддий кураш олиб борилмоқда. Хусусан, ер майдонларини ҳоким қарори билан ажратиш тартибидан тўлиқ воз кечилиб, талабгорлар учун адолатли ва шаффоф аукцион тизимга ўтказилгани бу тизим халқчиллигини таъминлади.

“Шаффоф қурилиш” дастури жорий этилганидан кейин эса ушбу соҳада ҳам ижобий ўзгаришлар сезилди.

Таъкидлаш жоизки, давлат харидлари бўйича махсус қонун қабул қилингани, танлов ва тендер савдолари рақамлашиб, соғлом рақобат юзага келганлиги туфайли биргина ўтган йилнинг ўзида республикамиз бўйича 14 триллион сўм бюджет маблағи тежалди.

Айни пайтда юртимиздаги барча банклар 100 миллион сўмгача маиший кредитларни инсон омилисиз, 5 дақиқа ичида онлайн расмийлаштириб беряпти. Банк ходимлари энди бевосита маҳаллага тушиб, истиқболли лойиҳалар ишлаб чиқиш, хусусий ва кичик бизнес, тадбиркорликни ривожлантириш ва шу орқали салоҳиятли мижозлар сонини кўпайтириш бўйича фаолият олиб бормоқда.

Юртимизда баркамол авлод орзуси йўлида амалга оширилаётган саъй-ҳаракатлар ҳам эътиборга молик. Янгиланиш ва ўзгаришлар жараёнида мактабгача ва мактаб таълими тизимида 10 дан ортиқ хизмат турлари тўлиқ электрон шаклга ўтказилди. Натижада ушбу соҳада мурожаатлар сони кескин камайди. Ўқитувчилар маошининг сезиларли даражада ошаётгани ҳам бу борадаги эзгу ташаббусларнинг амалий самарасидир.

Шунингдек, олий таълим тизими ҳам рақамлаштирилди. Аввал тест топшириб, тўплаган балига қараб, кейин олий таълим муассасасини танлаш жорий қилинди. Шу тарзда 35 турдаги ҳужжатларни инсон омилисиз олишга ўтилгани учун соҳадаги коррупцион ҳолатларга барҳам берилди.

Йиллар мобайнида ҳақли эътирозларга сабаб бўлиб келган яна бир соҳа – йўл ҳаракати хавфсизлиги инспектори “боди-камера”да хизмат ўтаётгани, авторақамлар аукционда сотилаётгани, қоғоздаги баённома

йўқ бўлгани учун коррупция омиллари кескин камайди.

Умуман олганда, кейинги йилларда давлат хизматчиларининг ойлик маошлари сезиларли даражада оширилди. Бу ҳам коррупция иллатига қарши кураш бўйича кўрилган муҳим чора-тадбирларнинг мантиқий давомидир. Мазкур жараёнда аҳоли ва тадбиркорлик субъектларига “халқ хизматидаги давлат” тамойили асосида фаолият кўрсатиш йўлга қўйилди. 120 турдаги ҳужжатларни талаб қилиш, 160 дан ортиқ лицензия ва рухсатномалар тартиби бекор қилинди.

Кейинги йилларда электрон давлат хизматлари сони 15 карра ортиб, 721 тага етди. Энг муҳими, булар орқали аҳоли, тадбиркорлар, хорижий ҳамкорларимиз, халқаро ташкилотлар ва инвесторларнинг ислоҳотларга ишончи мустаҳкамланди.

Албатта, сармоя киритиш истагида бўлган тадбиркор, энг аввало, давлатнинг инвестициявий муҳити барқарорлиги, яратиб берилган шарт-шароитлар, имкониятлар ҳамда ҳуқуқий кафолатларга қизиқади.

Порахўрлик, тамагирлик, коррупция ҳолатларига йўл қўйилмаслигига ишонч ҳосил қилсагина инвестиция киритади. Шундай экан, коррупцияга сабаб бўлаётган омилларни бартараф этиш, жамиятни бу балодан қутқариш масаласи муҳокамасини жиддий йўлга қўйиш, бу ҳақда кенг жамоатчилик ва халқаро ҳамжамиятни хабардор қилиб бориш долзарб аҳамиятга эга.

Демак, бугун коррупцияга қарши курашда барчамиз муштарак мақсад йўлида бирлашишимиз, бу борада амалга оширилаётган давлат сиёсатини қўллаб-қувватлаб, унда фаол иштирок этишимиз зарур.

Ҳурматли юртдошлар!

Коррупцияга қарши курашнинг сифат жиҳатдан мутлақо янги даражага кўтарилиши Президентимиз Шавкат Мирзиёевнинг сиёсий иродаси маҳсулидир. Давлатимиз раҳбарининг жамиятни «ҳалоллик вакцинаси билан эмлаш» зарурияти ҳақидаги фикрлари бу йўналишдаги ишларга қўйилган тамал тоши десак, асло муболаға бўлмайди. Бу ўринда давлатимиз раҳбари таъкидлаганидек, «Жамиятимизда коррупция иллати ўзининг турли кўринишлари билан тараққиётимизга ғов бўлмоқда. Бу ёвуз балонинг олдини олмасак, ҳақиқий ишбилармонлик ва инвестиция муҳитини яратиб бўлмайди, умуман, жамиятнинг бирорта тармоғи ривожланмайди».

Коррупцияга қарши курашишда, аввало, давлат хизматчилари намуна кўрсатиб, ҳалоллик ва адолат билан ишлашлари керак. Кўпни кўрган нуроний отахон-онахонлар фарзанд ва набираларига, ёшларга ҳалол меҳнат, ҳалол ризқ ҳақида насиҳатлар қилишса, ҳаром луқма гуноҳ саналиши, жиноят эканлиги хусусида тушунчалар беришса, “жамият танасидаги саратон”нинг олдини олишга баракали ҳисса қўшган бўладилар.

Мухтасар айтганда, коррупцияга қарши курашда жамоатчилик назоратини кучайтириб, унга нисбатан муросасиз муносабатни шакллантирайлик. Тамагирлик, порахўрлик ҳолатларига дуч келганда лоқайд, бефарқ бўлмайлик. Бу вабога қатъий чек қўйиш дахлдорлик туйғуси, ватанпарварлик бурчи ва фуқаролик масъулиятига айлансин!

Коррупцияга қарши курашда каттаю кичик бирлашиб, ҳамжиҳат ҳаракат қилайлик!