Farg'ona viloyati Toshloq tumani hokimligi

Farg‘ona viloyati hokimi Toshloq tumanida bo‘lib, qishloq xo‘jaligi sohasida amalga oshirilayotgan ishlar hamda fermer xo‘jaliklari faoliyati bilan yaqindan tanishdi. Tashrif davomida hududlarda yetishtirilayotgan qishloq xo‘jaligi ekinlarining holati, yerdan samarali foydalanish, hosildorlikni oshirish bo‘yicha amalga oshirilayotgan chora-tadbirlar ko‘zdan kechirildi.

Viloyat rahbari fermerlar bilan muloqot qilib, ularning mehnat sharoitlari, sohadagi yutuqlari va mavjud muammolari yuzasidan fikr almashdi. Suhbatlar davomida zamonaviy agrotexnologiyalarni joriy etish, suv resurslaridan oqilona foydalanish, yuqori hosildor navlarni ekish hamda mahsulot yetishtirish hajmini yanada oshirish masalalari muhokama qilindi.

Shuningdek, g‘allachilik va boshqa strategik ekinlar bo‘yicha erishilgan natijalar alohida e’tirof etildi. Tuman fermerlarining fidokorona mehnati, yerga bo‘lgan e’tibori va mas’uliyati tufayli yuqori ko‘rsatkichlarga erishilayotgani qayd etildi. Viloyat hokimi mehnatkash dehqon va fermerlarga minnatdorlik bildirib, sohani yanada rivojlantirish, qishloq aholisi daromadlarini oshirish hamda oziq-ovqat xavfsizligini ta’minlash borasidagi ishlar izchil davom ettirilishini ta’kidladi.

Tashrif yakunida mas’ullarga qishloq xo‘jaligi tarmog‘ini yanada taraqqiy ettirish, innovatsion yondashuvlarni keng joriy etish va fermerlarni har tomonlama qo‘llab-quvvatlash yuzasidan tegishli topshiriqlar berildi. Bu kabi amaliy muloqotlar sohadagi mavjud imkoniyatlarni to‘liq ishga solish va yangi yutuqlarga erishishda muhim ahamiyat kasb etadi.