Namangan tumanida yosh basketbolchilar o‘rtasida FIBA 3×3 chempionati o‘tkazildi
2026-08-13 11:55:00 / Yangiliklar
Namangan tumanida FIBA 3×3 chempionati o‘tkazildi
Namangan tumanidagi 24-sonli umumta’lim maktabida 2013–2017-yillarda tug‘ilgan yosh basketbolchilar o‘rtasida Namangan viloyati Rivojlanish ligasi doirasida FIBA 3×3 chempionati bo‘lib o‘tdi.
Musobaqaning ochilish marosimida Namangan tumani hokimi Sadritdin Mo‘minov, huquqni muhofaza qiluvchi organlar rahbarlari, sport mutasaddilari, murabbiylar hamda yosh basketbolchilar ishtirok etdilar.
Chempionatdan ko‘zlangan asosiy maqsad — yoshlar o‘rtasida basketbol sport turini yanada ommalashtirish, iqtidorli sportchilarni aniqlash va ularning sport mahoratini yuksaltirish, shuningdek, yoshlarni sog‘lom turmush tarziga keng jalb etishdan iborat.
Bellashuvlarda yosh basketbolchilar o‘zlarining chaqqonligi, jismoniy tayyorgarligi va sport mahoratini namoyish etib, g‘oliblik uchun qizg‘in kurash olib bordilar.
Ta’kidlash joizki, bunday sport musobaqalarining muntazam tashkil etilishi yoshlarning bo‘sh vaqtini mazmunli tashkil etish, ularda jamoaviylik va sog‘lom raqobat muhitini shakllantirish hamda kelajakda yurtimiz sharafini munosib himoya qiladigan iqtidorli sportchilarni tarbiyalashda muhim ahamiyat kasb etadi.