"Navbahor" yangilangan stadionida zafar quchdi: "Xorazm" yirik hisobda mag‘lub etildi
2026-08-02 22:30:00 / Yangiliklar
"Navbahor" o‘z uyiga g‘alaba bilan qaytdi
Bugun Davlatobod tumanidagi "Markaziy" stadionda katta futbol bayrami hukm surdi. Uzoq kutilgan rekonstruksiya ishlaridan so‘ng mamlakatimiz futbolsevarlari uchun aziz bo‘lgan ushbu sport maskani yana o‘z bag‘rini muxlislarga ochdi.
Ta’kidlanganidek, "Navbahor" futbol klubining o‘z maydoniga qaytishi nafaqat jamoa, balki minglab ishqibozlar uchun ham katta bayramdir. Keyingi yillarda klub tarkibidan O‘zbekiston milliy terma jamoasiga iqtidorli futbolchilar yetishib chiqqani, jumladan, 2026-yilgi jahon chempionatida darvozabon O‘tkir Yusupov va yarim himoyachi Ruslanbek Jiyanovning ishtirok etgani namanganlik futbolchilarning salohiyatini yana bir bor namoyon etdi.
Yangilangan "Markaziy" stadionda chim maydon jahon standartlari asosida qayta barpo etildi, klub qarorgohi ta’mirlandi va futbolchilar uchun zamonaviy fitnes zali barpo qilindi.
Shu kuni Superliganing 15-turi doirasida "Navbahor" o‘z maydonida Urganchning "Xorazm" jamoasini qabul qildi. Muxlislar qarshisida maydonga tushgan "lochinlar" raqibini yirik — 5:1 hisobida mag‘lub etib, yangilangan stadiondagi ilk uchrashuvni ishonchli g‘alaba bilan yakunladi. Bu natija futbol bayramiga yanada ko‘tarinki kayfiyat bag‘ishlab, minglab muxlislarga unutilmas tuyg‘ularni hadya etdi.
Tadbir yakunida jamoaning moddiy-texnika bazasini mustahkamlash va futbolchilarni har tomonlama qo‘llab-quvvatlash ishlari izchil davom ettirilishi ta’kidlandi. Muxlislar esa jamoani qizg‘in olqishlar bilan qo‘llab-quvvatlab, "Navbahor"ning yangi g‘alabalariga ishonch bildirishdi.
Davlatobod tumani hokimligi Axborot xizmati