Raqamli O‘zbekiston: Byurokratiyadan xoli, shaffof va tezkor xizmatlar sari yangi odim!
2026-01-09 08:55:00 / Yangiliklar
Bilish foydali: 2025-yil 1-dekabrdan nimalar o‘zgardi?
O‘zbekiston Respublikasi Prezidentining 2024-yil 8-sentyabrdagi PF–157-sonli Farmoni ijrosi doirasida 2025-yilning so‘nggi oyidan boshlab fuqarolar hayotini yengillashtiruvchi quyidagi tarixiy o‘zgarishlar hayotga tadbiq etildi:
• Nikoh qayd etishda ortiqcha hujjatlarga chek qo‘yildi: FHDYO organlari tomonidan nikohlanuvchi shaxslardan tibbiy ko‘rik natijalarini qog‘oz shaklida talab qilish tartibi bekor qilindi. Endilikda barcha ma'lumotlar elektron bazalar orqali o‘zaro almashinadi.
• Sud qarorini ko‘tarib yurish shart emas: Nikohdan sud tartibida ajralganda, dalolatnoma yozuvini shakllantirish uchun sud qarorini FHDYOga taqdim etish majburiyati olib tashlandi. Tizim avtomatik ravishda sud qarorini "Elektron hukumat" tizimidan oladi.
• Tex-pasportlarda yangi davr: Avtomototransport vositasining ro‘yxatdan o‘tganlik guvohnomasida (tex-pasport) mulkdorning manzilini ko‘rsatish talabi bekor qilindi. Bu esa yashash joyi o‘zgarganda hujjatni yangilash bilan bog‘liq ovvoragarchiliklarga chek qo‘yadi.
Kelajak rejalari: 2028-yilgacha bo‘lgan strategik maqsadlar
Hukumatimiz tomonidan belgilab berilgan "yo‘l xaritasi"ga ko‘ra, davlat xizmatlari tizimi quyidagi ulkan ko‘rsatkichlarni ko‘zlamoqda:
1. "Yagona darcha"ning mutlaq qamrovi: Kelgusi 3 yil ichida barcha turdagi xizmatlar to‘liq "yagona darcha" tizimiga o‘tkaziladi. 2028-yilga qadar Yagona interaktiv davlat xizmatlari portali (my.gov.uz) va Davlat xizmatlari markazlari orqali taqdim etiladigan xizmatlar soni 900 taga yetkaziladi.
2. Aqlli xizmatlar (Proaktiv va Kompozit): Inson aralashuvisiz ko‘rsatiladigan proaktiv xizmatlar soni 53 taga, bir-biriga bog‘liq bir nechta xizmatni bittada hal qiluvchi kompozit xizmatlar esa 74 taga yetkaziladi.
3. Shaxsiy kabinet – Sizning raqamli arxivingiz: 30 turdagi eng muhim ma’lumotlar va hujjatlar fuqaroning shaxsiy kabinetida real vaqt rejimida, mutlaqo bepul va doimiy saqlanishi ta’minlanadi.
4. Infratuzilma kengayishi: Olis va chekka hududlar aholisi uchun qulaylik yaratish maqsadida respublika bo‘ylab 1000 dan ortiq zamonaviy infokiosklar o‘rnatilishi rejalashtirilgan.
"Hayotiy vaziyatlar" tamoyili – Bu nima degani?
Xizmatlar endi alohida-alohida emas, balki muayyan bir hayotiy hodisaga bog‘langan holda (paketli xizmatlar) taklif etiladi.
Misol uchun: Avtomobil xarid qilgan fuqaroga bir vaqtning o‘zida ishonchnoma rasmiylashtirish, sug‘urta polisini olish, tonirovka ruxsatnomasi va gaz balon o‘rnatish xizmatlari taklif etiladi. Bu vaqtni tejashning eng samarali yechimidir!
Xulosa o‘rnida: Davlat xizmatlarining raqamlashtirilishi – bu shunchaki qulaylik emas, balki korrupsiya ustidan g‘alaba va xalqqa xizmat qilishning eng yuksak namunasidir. Yangiliklardan boxabar bo‘ling va vaqtingizni qadrlang!
Namangan tuman adliya bo‘limi
Davlat xizmatlari markazi sho‘ba mudiri Mamatxanov Abdulaziz A'loxonovich