Qoraqalpog`iston Rеspublikаsi Taxiatosh tumani hokimligi

Xotin-qizlarni qo‘llab-quvvatlash sohasidagi yangiliklar

O‘zbekiston Respublikasining "Oila va xotin-qizlarni qo‘llab-quvvatlash sohasini takomillashtirish munosabati bilan O‘zbekiston Respublikasining ayrim qonun hujjatlariga qo‘shimcha va o‘zgartishlar kiritish to‘g‘risida"gi 2025 yil 9 aprel kungi qonuni bilan O‘zbekiston Respublikasining Oila kodeksiga qo‘shimchalar kiritilib, unga ko‘ra nikohdan ajratish to‘g‘risidagi ishlar ko‘rilayotganda sud oilaviy (ijtimoiy) zo‘ravonlikdan jabrlangan shaxsning talabiga ko‘ra yarashish uchun muddat tayinlamasligi belgilangan.

Shaxs qanday holatda oilaviy (ijtimoiy) zo‘ravonlikda jabrlangan deb hisoblanadi.

O‘zbekiston Respublikasi Ma’muriy javobgarlik to‘g‘risidagi kodeksining
592-moddasiga ko‘ra, oilaviy (ijtimoiy) zo‘rlik, ya’ni ushbu moddaning birinchi qismiga ko‘ra, xotiniga (eriga), sobiq xotiniga (sobiq eriga), bir oila asosida birgalikda yashayotgan shaxsga yoki umumiy farzandga ega bo‘lgan shaxsga nisbatan sodir etilgan mol-mulk, ta’lim olish, sog‘liqni saqlash va (yoki) mehnatga oid huquqni amalga oshirishga to‘sqinlik qilish, mol-mulkiga va shaxsiy buyumlariga qasddan zarar yetkazish, xuddi shunday shaxslarning sog‘lig‘i yomonlashuviga olib kelgan tarzda ularning sha’nini kamsitish, ularni qo‘rqitish, yaqin qarindoshlaridan ajratib qo‘yish, jinoyat alomatlari, shuningdek, ushbu Kodeksda nazarda tutilgan boshqa huquqbuzarlik alomatlari bo‘lmasa, bazaviy hisoblash miqdorining o‘n baravaridan yigirma baravarigacha miqdorda jarima solishga yoki o‘n sutkagacha muddatga ma’muriy qamoqqa olishga sabab bo‘ladi.

Ushbu moddaning ikkinchi qismiga ko‘ra esa, xotinning (erning), sobiq xotinning (sobiq erning), bir oilaviy asosda birga yashayotgan shaxsni yoki bolani, shuningdek, umumiy farzandga ega bo‘lgan shaxsni urish, ushbu shaxslarga nisbatan sog‘lig‘ining qisqa muddatga yomonlashuviga yoki mehnat qobiliyatining uncha uzoq bo‘lmagan muddatga yo‘qolishiga olib kelmagan qasddan yengil tan jarohati yetkazish bazaviy hisoblash miqdorining o‘n baravaridan yigirma baravarigacha miqdorda jarima solishga yoki o‘n besh sutkagacha muddatga ma’muriy qamoqqa olishga sabab bo‘ladi.

Ushbu Qonun oilaviy (ijtimoiy) zo‘ravonlikdan jabrlangan shaxslarning huquqlari va qonuniy manfaatlarini himoya qilishni yanada kuchaytirishga xizmat qiladi.

Nukus tumanlararo ma’muriy sudining sudya yordamchisi A.Kenesbayeva